Kuhva chingtu ten kuhva tawlh tihtawp an duh

Hachhek Bial Kuhva Chingtu Pawl chuan Dan lova Kuhva tawlhruk in an eizawnna ber Kuhva hralhna kawngah harsatna a thlen avangin Sawrkarin a rang thei ang berin ti tawp se an duh hle tih an sawi.

Nimin-a thuchhuah an siamah Hachhek Bial Kuhva Chingtu Pawl chuan tunlai hian Burma ram atangin Dan lovin Mizoram kaltlanga Kuhva tawlhruk a tam hle nia a lan thu leh hei hian Hachhek Bial chhung khaw tam zawkte eizawnna bulpui ber, Kuhva hralhchhuahna kawngah harsatna nasa tak a thlenin, Huan neitute an mangang hle tih an tarlang a. Hachhek Bial khaw 30 chuangah Kuhva huan siama eizawng hi an awm vek tih sawiin, kum 2019-2020 chhung khan report an dawn chin khaw 12 atangin Kuhva hralhna man hi cheng nuai 1141 chuang hmuh niin kum 2020-2021 ah hian cheng nuai 2000 chuang hmuhchhuah beisei a nih lai a hetiang harsatna lo awm ta hi pawi an ti takzet tih an sawi.

Hachhek Bial Kuhva chingtute Kuhva thar leitute hi Assam Vai vek niin Patharkandi (Assam)-a MLA Krishna Nanda Pal chuan Mizoram atanga Kuhva thawnluhte chu Burma Kuhva te nen chawhpawlh vek ni a puhin, an Kuhva tharchhuah ngei ngeite pawh Assam a tawlhluh a rem ti lo tih sawiin, Kuhva huan neitu te sum hmuhna hnar an chhut chah sak tih an sawi a. Hemi chungchanga an harsatna hi thuneitu sang zawkte hnenah pawh ziaka an thlen tawh thu sawiin, an harsatna sukiang tur hian hma lakpui se an duh tak meuh tih an sawi a. Dan lova Kuhva tawlh thintute pawh an Mizo puite ngei eizawnna ti thuanawp lo turin Mizoram Kuhva tharchhuah hun lai hi chuan Kuhva an kaltir hi lo chawlhsan tura an duh thu an sawi a. Dan lova Kuhva tawlhruk hian an eizawnna ber Kuhva hralhna kawngah harsatna a thlen avangin Sawrkarin a rang thei ang berin titawp se an duh hle tih an sawi a ni.

Comments

Popular News (Last 30 Days)

Serchhip DCSO sawn a ni