Tuirial bial bye-election a MNF MLA candidate tlin lawmna leh lawmthu sawina neih a ni

MNF General Hqrs. huaihawtin nimin khan Aizawl Vanapa Hall-ah Tuirial bial bye-election a MNF MLA Candidate tlin lawmna leh lawmthu sawina hun hman a ni.

Nimin-a he hun hmanna ah hian MNF President leh Chief Minister Zoramthanga chuan Tuirial bial chu Kawnpui bial a nih lai atang khan hnehna chan changte chu nei ve zauh thin mah se MNF thatlohna bial a ni thin tih sawiin, tun tumah hnehna an chang chu an lawm takzet tih a sawi a. “Pathian malsawmna kan dawng a, lawmthu inhrilh tur ber pawh kan awm chuang lo a, Pathian leh Tuirial bial mipui hnenah a bikin lawmthu kan sawi a ni,” a ti.

Covid avanga kan sum chan chungchang sawiin Chief Minister chuan, kum khat leh thla 10 chhungin sawrkar laipui atanga kan hmuh tur cheng vbc. 2800 vel zet a ni a, chuti chungin sawrkar hnathawk hlawh kan la pe thei zel a, ei/barah harsatna lian tham em em kan la lawk lo hi a lawmawm takzet a ni, a ti bawk.

He hunah hian Tuirial bial atanga MLA atana thlantlin thar K. Laldawngliana pawhin, “Pathian leh kan ram tan tituten hnehna kan chan avangin Pathian chu fakin awm se la. Kan party President Pu Zoramthanga leh kan party hruaitu zawng zawngte chungah lawmthu ka sawi bawk a. Hripui a leng a, ramri buaiah inkahna te a awm bawk a, he mi karah ram kaihruai tur hian Pathian in MNF hi a ruat a. MNF party ang tluka inlungrual tha leh thawhhona tha hi party dang an awm ve ka ring lo,” a ti a. Tun tum inthlana hnehna an chang chu MNF tan chauh a ni lo, Tuirial bial mipui tan a ni tih sawiin, “Tuirial bial mipui, a bikin mi harsate tan ka ding tlat dawn a ni. Chhungkua leh mimal ang pawhin in harsatna ka hnenah in rawn sawi zel dawn nia,” a ti bawk.

Tuirial bial Bye-Election Campaign Committee Chairman leh MNF Treasurer K. Vanlalauva kaihhruai he hunah hian MNF Sr. Vice President Tawnluia pawhin tun tum bye-election ah khan party tinte an tang in thahnem an ngai tlang vek bawk nia a hriat thu sawiin, chutih laiin Bial lian vak lo ah hnehna sang tak an chang chu a lawmawm em em tih a sawi a, “Tuirial bial mipui zingah amah vote ve lotute pawhin Pu Dawngtea hi in ta vek, in bial tana in MLA a ni a, Tuirial bial mipui ta a ni,” a ti. Tuirial bial-a inthlanna neih zawh tak chu Free and Fair Election-ah an ngai tih pawh sawiin, “Pathian in Zoram mipuite amah rawn chunga kaihruai turin min duh a ni. Tunah hian MLA seat 40 awmah seat 28 kan nei mek a, Pu Zoramthanga kaihhruai hi Zoram mipui enkawl turin ram mipuiin kan la ring tawk a ni. Lal hrawt turin Pathian in min ti lo, mipui rawngbawl turin min ti zawk a ni,” a ti bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man