Tuirial bial bye-election-ah MNF Candidate K. Laldawngliana hneh taka thlantlin a ni

October 30, 2021-a Tuirial bial Assembly Bye-election a vote tla te chu nimin khan tluang taka chhiar niin rorellai MNF Candidate K. Laldawngliana chu hneh taka thlantlin a ni a, amah hnaih bertu ZPM Candidate Laltlanmawia chu vote 1284 in a hneh a ni.

Kumin August 17-a Tuirial bialtu MLA Andrew H. Thangliana a boral avangin October 30, 2021 khan 4-Tuirial AC-ah hian bye-election hi neiin mipuite'n vote an thlak a, he inthlana vote tla te hi nimin zing dar 8:00 atang khan Govt. Kolasib College-a Counting Hall-ah chhiar niin, rorellai MNF Candidate K. Laldawngliana chuan vote 5820 hmuin thlantlin a ni a, amah hnaih bertu ZPM Candidate Laltlanmawia chuan vote 4536 a hmu a. K. Laldawngliana a phak lohna hi vote 1284 a ni. He inthlan ah hian Candidate 4 awmin Indian National Congress (INC) Candidate Chalrosanga Ralte chuan vote 3927 hmuin pathumna a ni a, BJP Candidate K. Laldinthara chuan vote 246 a hmuin NOTA-ah vote 61 a tla bawk a ni.

Tuirial Constituency chhungah hian Polling Station 27 awmin, vote nei 17,911 an awm a, tun tum bye-election ah khan vote 14,561 (81.29%) tlain he inthlanna a thlantlin ni ta MNF Candidate K. Laldawngliana hian Polling Station 21-ah hnehna changin, ZPM Candidate Laltlanmawia'n Polling Station pathum-ah chak ber nihna a chang a, INC Candidate Chalrosanga Ralte chuan Polling Station pahnih-ah hnehna a chang a. Kawnpui-II Polling Station-ah MNF leh ZPM Vote hmuh a inzat thung a. Kum 2018 MLA inthlan khan ZPM atanga Independent-a thlantlin Andrew H. Thangliana chuan vote 4387 hmua hnehna a chanpui laiin, tun tum bye election-a thlantlin tak K. Laldawngliana aiin vote 1433 laiin a hmu hniam zawk a, tun tum hi he bial inthlana inhnehna san ber tum a ni bawk.

Mizoram State Assembly inthlan hmasa ber February 16, 1987-a neihah Tuirial bial hi Kawnpui bial tih a la ni a, hemi tum hian Vote 9422 awmah vote 7383 tlain, Candidate zingah Lalkhawnghinga chu thlantlin niin ani hian MNF zawmin he bial hi MNF in an chang a. Kum 1998-a Assembly inthlanah he bial hi MNF in la lehin, Sanghmingthanga Pautu thlantlin a ni ve leh a. MLA bial siamrem hnu, Tuirial bial tih a nih hnuah erawh tun tum hi MNF Party in he bial-a hnehna an chan vawikhatna a ni.

MNF Party chuan nimin khan thuchhuah siamin Tuirial bial-a bye-election neih ah MNF Candidate K. Laldawngliana hneh taka thlantlin a ni chu lawmawm an tih thu an sawi a. Congress Party pawhin an lawmpui thu leh Tuirial bial tana an thutiamte tihlawhtling ngei turin duhsakna an hlan a. BJP pawhin an lawmpui thu sawiin, ZPM President Lalliansawta pawhin an lawmpui thu lehTuirial bial mipuite tan MLA tangkai tak a nih ngei pawh a beisei thu a sawi bawk.