Tuirial bial-ah tluang taka Vote thlakin Naktuk-ah Vote tla te chhiar nghal a ni ang

Kum 2018 MLA inthlanpui-a Tuirial bialtu MLA atana thlantlin Andrew H. Thangliana a boral avanga a bial ruak hnawhkhatna tura inthlanna atan Inrinni khan mipui ten tluang takin Vote an thlak a, naktuk-ah Vote tla te hi chhiar a ni ang.

Election Commission of India in ruahmanna a lo siam tawh angin Tuirial bial-a Assembly bye-election atan hian Inrinni, October 30, 2021 zing dar 7:00 atang khan Vote nei ten Polling Station hrang hrang 27-ah Vote hi an thlak a, tlai dar 6:00 thlenga Vote thlakna hun hawn ah khawi atangin mahin thil duhawmlo a thlen hriat a ni lova, he bial chhungah hian Vote nei mipa 8819 leh hmeichhia 9092, an vaiin 17,911 awmin mipa 7152 leh hmeichhia 7409 ten Vote thlakin Vote thlak zawng zawng hi 14,561 an ni a, Vote nei zinga za zela 81.29 te chuan Vote an thlak a ni.

Polling Station hrang hrang zingah Lungmuat Polling Station chu Vote tlak thatna ber niin Vote nei 487 awm ah mi 431 ten Vote an thlak a, Vote nei za zela 90.96 ten vote an thlak a, Serkhan Polling Station-ah Vote nei 543 atangin mi 489 ten Vote thlakin za zela 90.05 a tla bawk. Zodin/Rasdali Polling Station chu Vote thlak chhiatna ber niin Vote nei 744-ah Vote 216 a tla a, za zela 29.03 tla ang niin hei hi he Polling Station-a Vote nei Tripura-a awm mek ten Vote an rawn thlak loh vang niin a lang a, Rastali-a Vote nei zinga 487 te chu Tripura-a awm te nia hriat an ni a, heng te hi paihin he Polling Station-a Vote tla hi za zela 82 vel a tling phak tho a ni.

Tuirial bial-a bye-election ah hian tluang taka Vote thlak niin Vote nei zingah COVID-19 hri kai mi 35 te chu Vote thlak tur hian in report in an zinga mi 34 te chuan Vote hi an thlak a, Vote thlak zawhfel a nih veleh Vote thlakna atana hman EVM te hi Strong Room lamah lak nghal a ni a, Sethawn Polling Station chuan zan dar 7:42-ah Strong Room hi thlengin an thleng hmasa ber a, a thleng hnuhnung ber Lungdai-II Polling Station chuan zan dar 11:15-ah an thlenpui bawk a, Vote thlakna atana hman EVM te hi venhimna khauh tak hnuaiah dah nghal niin naktuk, November ni 2,2021 (Thawhlehni) hian he inthlanna a Vote tla te hi Government Kolasib College-ah chhiar a ni ang.

Kolasib District Election Officer Dr. H. Lalthlangliana chuan nimin khan Kolasib DC Conference Hall-ah thuthar thehdarhtute kawmin Inthlan chhung zawngin bial chhungah harsatna lian tham a awm loh thu sawiin, Inthlanna felfai leh thianghlim awm se an duh ang ngeiin inthlanna felfai leh thianghlim a awm nia an hriat thu a sawi a. Mipuite pawhin Election Official te bakah VLTF leh MPF kaihhruaina hnaiah Vote tluang takin an thlak thu a sawi a. Inthlanna felfai leh thianghlim a awm theihna tura thawktute zawng zawng chungah lawmthu a sawi bawk.

Comments

Popular News (Last 30 Days)

Serchhip DCSO sawn a ni