Serchhip District-ah zirna In 113 te hawng tawhin heng zinga 20 te khar leh an ni

COVID-19 hri leng laka himna tura inkaihhruaina siam hnuaiah Serchhip District-a zirna In 113 te chu SOP zawm chunga hawn ni tawhin hri leng avangin zirna In 20 te chu khar a ni leh tawh.
Serchhip District Education Officer (DEO) Office atanga thu kan dawn danin Serchhip District-ah hian Govt School, SAMAGRA, Adhoc GIA, Lumpsum leh Private School te huam vekin Higher Secondary School 13, High School 49, Middle School 103 leh Primary School 93, a vaiin zirna In 257 a awm a, heng atang hian Zirna In 113 te chu an dil angin SOP zawm chunga School an hawn phalna pein hawn a ni tawh a, an zinga School 20 te chu hri leng avanga khar leh niin chhinchhiahna thar berah chuan zirna In 93 hawn mek a ni.

Tun thlenga Serchhip District-a zirna In hawn phalna pek tawh zingah hian Middle School tam berin 41 pek an ni tawh a, heng zinga 10 te khar leh niin 31 hawn mek a ni a, Higher Secondary School 7 phalna pek tawh ah pakhat khar leh niin 6 hawn mek a ni a. High School 29 hawn tawh ah 2 khar lehin 27 hawn mek a ni a, Primary School 36 hawn tawh ah 7 khar lehin 29 hawn mek a ni bawk.

Serchhip DEO Office a thawktute chuan School hawn mek leh khar tawh hi a danglam ve deuh reng tih sawiin, khaw thenkhat School hawn phalna pek tawh te chu an khua ah hri kai hmuhchhuah an awmin VLTF leh School thuneitute inrawnin khar leh a ni thin tih an sawi. Heng zirna In hrang hrang te hi hawn phalna pek an nih rual hian sawrkar in hri leng laka himna tura inkaihhruaina a siam hrang hrang te tha taka zawm tura tih vek an ni tih pawh LENKAWL an hrilh bawk.

Comments

Popular News (Last 30 Days)

Serchhip DCSO sawn a ni