Serchhip-ah Police leh END-a thawk ten ND&PS Act leh MLP Act chungchang an zir

Serchhip District Legal Services Authority buatsaihin nimin khan Serchhip-ah Police leh Excise & Narcotics Department-a thawkute tan ND&PS leh MLP Act chungchangah Legal Awareness Campaign neih niin kum 5 chhungin Serchhip Police ten ND&PS Act hnuaiah thubuai 40 an ziaklut tawh tih tarlan a ni.

Bharat Ka Amrit Mahotsav hnuaia Serchhip SP Conference Hall-a he Awareness Campaign hi Serchhip-a Judicial Magistrate 1st Class, JH. Lalparmawii chuan kaihruaiin Zu leh damdawi kaihhnawih a thubuai nei ten an phu tawk hremna an hmuh theihna tur chuan a mantu Police leh Excise and Narcotics Department ten lehkha felfai an neih a pawimawh thu a sawi a, mi tam tak ten thubuai nei zinga hremna pek tura an ngaih te pawh Court-a an document phawrhchhuah ah fello a awm thin avanga chhuah mai an awm thin thu sawiin, hei vang hian ND&PS Act leh MLP Act hnuaia thubuai nei te hrem an nih theihna turin Court-ah finfiahna dik leh hnialthlak theihloh an chhawpchhuah a pawimawh thu a sawi a ni.

He hun hi Serchhip Addl. SP Vanlalnghenga pawhin hmanpuiin Dan leh thupek kenkawhna kawnga thawktute hetianga inhmuhkhawmna neih thin hi a pawimawh thu leh neih fo pawh a that thu sawiin, amaherawh chu hri leng avanga neih mai theih erawh a nih loh thu a sawi a. Police leh Excise Department-a thawktute chu hna zahawm thawktu an ni tih an in hriat a ngaih thu sawiin, “Kan thawk ta rau rau a, theihtawp kan chhuah a ngai a ni,” a ti a. Kum 5 kalta, 2017 atanga kumin thlengin Serchhip Police ten ND&PS Act hnuaiah thubuai 40 ziahluh tawh a nih thu leh heng zinga 33 te chu Heroin No. 4 kaihhnawih niin a dang 7 te chu Ganja kaihhnawih a ni tih a sawi bawk.

ND&PS leh MLP Act chungchanga Legal Awareness Campaign-ah hian Serchhip DEF-a Police te leh Excise & Narciotics Department atangin ruihhlo leh a kaihhnawih manna kawnga thawk thin mi 22 an tel a, Peter Zohmingthanga, Asst. Commissioner, Excise & Narcotics Department Hqrs., Aizawl chu Resource Person atan hman niin ani hnen atang hian Narcotics Drugs and Psychotropic Substances Act, 1985 leh Mizoram Liquor (Prohibition) Act, 2019 chungchanga hriattur pawimawh hrang hrang ngaihthlak a ni a, tunlai khawvel changkang zelah internet hmangin mitin ten kan thil hriat duh hrang hrang kan zawnchhuah zung zung theih tawh avangin thubuai chhuina kawngah pawh dik taka hmalak a pawimawh thu a sawi a, pawikhawihtu ten an tihsual lai te an chhui ve reng thin avang leh an thil tihsual palh hlek te pawh Social Media Platform hrang hrangah awlsam taka thehdarh zung zung theih a nih avang leh a lansarh thin avanga an fimkhur a tul thu a sawi bawk.

Comments

Popular News (Last 30 Days)

Serchhip DCSO sawn a ni