RD Department hi thingtlang mi ten leirem an rah theih nana hmalatu a ni - RD Minister

Rural Development Department changtu Minister Lalruatkima chuan RD Department chu Department pawimawh tak pakhat, thingtlang miten leirem an rah theih nana hmalatu a ni tih a sawi.

Chhungkaw 12 te luah theih tur Serchhip-a RD Department Staff Quarters hawnna leh Serchhip RD Block kum 60 tlin lawmna nimin a neih a hmanpuina RD Minister chuan RD Department chu Department pawimawh tak pakhat, thingtlang miten lei rem an rah theih nana hmalatu a ni tih hi sawiin, Central sawrkar pawhin a ngaipawimawh hle tih a sawi a, “Kan ramah mihring awm zahve aia tam mah thingtlangah kan awm a, chung mite khaichhuaktu atana thawktu pawimawh tak chu a ni,” a ti. RD Minister chuan Vawiin-a RD hmalakna kal mek pakhat, thingtlang mite tan kum khata ni 100 inhlawhna siam chu ni za tlina harsa em em thin tih pawh sawiin, chutih lai chuan tun hnai kum 2 chhungin kan District-ah ni 100 inhlawhna siam a ni tawh tih a sawi a, kuminah pawh COVID-19 hri leng karah ni 100 inhlawh thei turin hma lak mek a ni tih sawiin, MGNREGA-a Serchhip District hmalakna tlangpui a tarlang bawk. RD Minister chuan Serchhip RD Block Diamond Jubilee chuan hnathawh tlo zawk leh mawi zawk hringchhuak se, kum kalta aia hnathawh tha zawk rah chhuah nei se a duh tih sawiin, thingtlang kilkhawr ber ber a miten zirna tha leh hriselna tha an neih theih nan tan kan lak zel a ngai tih a sawi bawk.

RD Minister chuan kum 60 tlin chu thil awlsam a ni lo tih sawiin, “Thlen vek duh mahila thleng zo ta lo mi tam tak an awm a ni,” tiin Serchhip RD Block in kum 60 a tling thei chu Pathian venna avang a nih thu leh lawmthu sawi tur tam tak an neih thu a sawi bawk.

Nimin-a hawn tak Serchhip P&E Veng-a RD Staff Quarters building panga (5) te hi SEDP sum Rs. 3,72,82,000/- senga sak niin building tin hi a dung ft. 42 leh a vang ft. 30-a zau niin a vaiin a chhawng-a sak a ni a, chhungkaw 12 chen theihna tura ruahman niin nikum hmasa lama Leisekawt Mual laihzauh a nih avanga BDO Staff Quarters thenkhat thiah a nih hnua sak a ni.

Serchhip RD Block hi 4th August, 1961 khan Community Development Block (CD Block) tia hawngin bul tan a ni a, JK. Khenglawt chu BDO hmasa ber niin BDO mi 30 zet awm tawhin tunah hian Lalrinchhani Ralte chuan BDO hna hi a chelh mek a, an hnuaiah hian Village Council 43 a awm mek a ni. Nimin-a Diamond Jubilee lawmna ah hian RD Secretary bakah an Department-a hotu pawimawh te pawhin thu an sawi bawk a ni.

Comments

Popular News (Last 30 Days)

Serchhip DCSO sawn a ni