Thenzawl khaw tuilakna hna thawh mek enfiah

PHE Department in Thenzawl chawmna atana Tui lak hna an thawh meka Tui dahkhawlna tur Tuizem lian pahnih siam mek chu nimin khan Vantawng Group YMA Vigilance & Monitoring Committee leh Thenzawl Joint YMA hruaitute chuan a hmunah tlawhin an enfiah.

Thenzawl khaw chawmna tura Tui lak hna thawh mekah hian Thenzawl Vengthar-ah litre 6,05,000 dawng pahnih siam niin cheng nuai 42 ve ve, a vaiin cheng nuai 84 senna tura ruahman a ni a, tualchung mi ten a siam hna hi thawkin, helai hmun tlawhtu YMA hruaitute chuan an hnathawh chu Thenzawl khaw mipuite tana hna pawimawh tak thawktu an ni tih hriaa a tha thei ang bera hna thawk tur leh hmanrua pawh a tha thei ang ber hmang turin an ngen a, Contractor te pawhin an theih chinah a tha thei ang ber zela hna thawh an tum thu an sawi bawk a ni.

PHE Department hian NABARD hnuaia RIDF Project kaltlangin cheng nuai 511.764 sengin Vanva lui pump turin tunah hian hma an la mek a ni.