MUP ten Serchhip-ah Social Welfare & Tribal Affairs Department-a thawktu dah an phut

Mizoram Upa Pawl (MUP) Serchhip District chuan Tar Chawmna an dawn thin ah harsatna an tawh avangin hemi buaipuitu tur hi Social Welfare Department hnuaiah sawrkar in thawktu pakhat tal Serchhip-ah dah se an duh tih an sawi.


 MUP Serchhip District te hi nimin khan Serchhip Bazar-a MUP Office-ah an President, CL. Ramngaia kaihhruaia thukhawmin National Social Assistance Programme (NSAP) hnuaia Indira Gandhi National Old Age Pension Scheme atanga tanpuina, Tar Chawmna tia hriat an dawn thin chungchang hi an sawiho a. Thutkhawm an neih zawh hnua LENKAWL zawhna chhangin MUP Serchhip District President, CL. Ramngaia chuan Social Welfare Department kaltlanga Tar Chawmna an dawn thin chu sawrkar in Social Welfare Department chu Department pahnih-ah a then hnuah Serchhip-a awm ICDS chuan Tar Chawmna chungchang hi an khawih zui loh thu leh Social Welfare & Tribal Affairs Lunglei-a District Social Welfare Officer hnuaiah Serchhip District chu dah a ni ta tih a sawi a. A tir lamah hian MR pakhat dahin Tar Chawmna hi buaipui mah se a hnu lamah a chawlh tak avangin harsatna an tawk tih a sawi a ni.

 Hetianga harsatna an tawh hnu hian sawrkar in DSWO Aizawl East District hnuaiah Serchhip hi a dah leh tih sawiin MUP President chuan, hemi chungchang sawihona nei tur hian DSWO Aizawl East District, F. Lalngaihawmi chu Serchhip-a kal tura an sawm thu leh nimin khan Serchhip-ah hian rawn kalin harsatna an tawh te an sawiho thu a sawi a. Mizoram Upa Pawl te chuan an harsatna sutkian a nih theihna turin Serchhip-ah District Social Welfare Officer (DSWO) Office awm ngei se an duh thu leh tunah hian Post siam nghal a harsa a nih pawhin Staff pakhat tal sawrkar in rawn dah se an duh tih a sawi a, hemi chungchangah hian a tul anga hma an lak zel dawn thu a sawi bawk.


 Hemi hnu nimin chawhnu lam khan Social Welfare & Tribal Affairs Department-a DSWO (Aizawl East) F. Lalngaihawmi chuan Serchhip Bazar-a MUP Office hi tlawhin MUP Member te nen inkawmna neiin an harsatna te hi an sawiho a. He hunah hian DSWO chuan MUP ten an harsatna an sawi chu a hriatpui thu leh an harsatna tawh mek chinfel a nih theih nan a theih anga lo puih a tum tur thu a sawi a. Tar Chawmna chungchanga hriattur pawimawh hrang hrang sawiin, tunhma lama Tar Chawmna dawngtu boral an awm changa an aiawh tur dah nghal thin chu dah a nih tawh dawn rihloh thu leh sawrkar in ruahmanna thar siama kalpui a tum thu te a sawi bawk.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man