COVID-19 hri kai enkawl dam tawh te fimkhur taka inenkawl chhunzawm turin chah

Zoram Medical College (ZMC) COVID Task Force-a Nodal Officer, Dr. PC. Lalramenga chuan COVID-19 hri kai te an negative hnuah virus hnathawh vanga natna hrang hrang an la neih theih avangin thla engemaw zat chhung chu fimkhur taka an inenkawl a ngai tih sawiin, hemi chungchangah hian zirchianna a kal mek thu a sawi bawk.

Nimin-a thuchah a siamah Dr. PC. Lalramenga chuan COVID-19 hri kaite an negative hnua dam fel hmak a tam zawk an nih laiin mi engemaw zat chuan a tira natna an neih lem loh natna dang khirh tak tak an vei thei tih zirchianna leh an tawnhriat atangin an hmu tawh tih a sawi a, natna benvawn leh khirh neisa te pawh an inenkawl uluk a ngai lehzual tih sawiin, COVID hri kai tawh loh hnu (Post-COVID) a harsatna awm theite hi khawvel hmun hrang hrangah an zirchiang mek tih sawiin, thla engemawzat chhung chu fimkhur taka an inenkawl a ngai tih a sawi a, “Zirchianna kal mek a nih avangin thla engzat chhung nge tih leh engtia rei chiah nge tih hi sawi chat theih a la ni lo,” a ti.

Dr. PC. Lalramenga chuan COVID-19 hi virus a nih avangin kawng hrang hrangin taksa a nghawng thei tih a sawi a khawvel hmun hrang hrang leh Mizoram-a COVID-19 hri kai negative tawhte atangin hei hi a takin kan hmu mek tawh tih a sawi a. An tawnhriat leh zirchianna awm tawh zingah COVID-19 hrik in a khawih nat ber chu Chuap a nih thu a sawi a, heng bakah hian Lung, Tihrawl leh Ruh chuktuah, Thluak leh Rilru lamte hi a khawih nasat zual a nih thu a sawi bawk.

COVID-19 hrik in mihring Chuap a khawih nasat avangin negative tawh te pawh an inenkawl uluk a ngai hle tih sawiin, “Kan Chuap hi oxygen kan lakluhna a ni a, thisen nen a lo chawhpawlh hnuah taksa tana chaw tha leh chakna petu siamin a thawndarh leh thin a, a pawimawh em em a ni. Kan Chuap a lo khawih chhiat nasat hman chuan harsatna lian tak kan tawk thei a ni,” a ti a. Virus hrik in Thisen zam-a thisen kallai a tih khang theih avang leh thisen kaltluang lai a dan chah theih avangin Lung natna chi hrang hrang bakah Heart Attack neih thut te a thlen thei a, Tihrawl leh Ruh chuktuah na thumte bakah Depression leh Anxiety thlengin a thlen thei tih pawh sawiin, COVID-19 hri kai te chu an negative hnuah pawh regular takin medical check up nei thin turin a chah a, Doctor ten ‘an him e’ an tih hma chu inenkawl uluk hle turin a chah a ni.

COVID-19 hri kai negative te chu taksa sawizawi leh hnathawh kawngah a chin tawk an hriat a pawimawh tih pawh sawiin, hah tak leh thlan tla bawrh bawrh khawpa thil tih loh rih a pawimawh tih a sawi a, nidang-a kan taksa insawizawi leh hnathawh dan chanve vel tala kan tih a ngai a, ei leh in lamah pawh insum a tul a, zuk leh hmuam tih loh bakah Thau leh Mawm ei lohte a pawimawh tih sawiin, theirah leh thlai rah lam ei uar a tul thu te a sawi bawk.