Mizoram-ah nikum chhungin nau piang leh thi zingah Hmeichhia aiin Mipa an tam zawk

/

Nikum 2020 chhung khan Mizoram-a nau piang zingah mipa an tam zawk a, hemi chhung hian Mizoram-a thi zingah pawh mipa an tam zawk bawk.

Economics & Statistics Department-in tunhnaia an tihchhuah, ‘Annual Report of Registration of Births & Deaths Mizoram, 2020’ a tarlan a nih danin nikum 2020 chhung khan Mizoram-ah nau piang 23,320 an awm a, heng zinga 11,934 chu mipa an niin a bak 11,386 chu hmeichhia an ni a. Nikum chhunga nau piang zinga 17,048 hi damdawi In-a piang niin, a dang zawng hi In leh hmundang remchang laia nau piangte niin nikum-a Mizoram Birth Rate chu 17.28% a ni a, hei hi kum hmasa aiin a hniam zawk a ni.

Chhinchhiahna atanga a lan danin nikum chhung vek khan Mizoram-ah mitthi 6,703 an awm bawk a, heng zinga 4,266 hi mipa niin hmeichhia thi 2,437 an awm bawk a, Hmeichhia aia mipa thi an tam zawkna hi 1,829 a ni a. Mitthi zawng zawng atanga chhutin hmeichhia aia mipa thi an tam zawkna hi 63.64% a tling a ni. Nikum chhung vek khan nausen thi (kum 1 hnuai lam) mi 384 an awm bawk a, nausen thi zinga 204 hi mipa niin hmeichhia 180 an awm bawk a, nikum chhunga Mizoram-a Death Rate chu 4.97% a ni.

Economics & Statistics Department chhinchhiahna atanga a lan danin nikum chhung khan Mizoram District hrang hrang zingah Aizawl District chu nau piang tamna ber niin 8,795 an piang a, Hnahthial District-ah tlem berin 313 an piang a, Hnahthial District-ah mitthi tlem berin 138 an laiin mitthi tamna ber Aizawl District-ah mitthi 3,124 an awm bawk a. Economics & Statistics Department chhut danin October 1, 2020-a Mizoram mipui awm zat tur chu 13,49,349 a ni.

Nausen thihna (Infant Mortality Rate)-ah kum hmasa lam aiin nikum khan a sang a. IMR hi kum 2016-ah 12.66% niin kum 2017-ah 17.35% a ni a, kum 2018-ah 14.48% ni lehin kum 2019-ah 13.31% leh nikum-ah 16.47% a ni thung. IMR hi ram pum ngaihtuah (national average) ai chuan Mizoram chu a hniam zawk a ni. Hei bakah hian nikum ah khan nau thi sa-a piang (Still birth) 156 an awm bawk. (Zalen)

Comments

Post a Comment

Popular News (Last 30 Days)

SDVA in hruaitu tur thlang

/
Image
Serchhip District Volleyball Association (SD-VA) chuan nimin khan khan Serchhip Kawnpui VC Hall-ah kum 2024-2025 chhunga an Pawl hruaitu tur thlanna an nei a, President-ah K. Tlangthanmawia (Bazar Veng); Sr. Vice President-ah VL. Hruaitluanga (Bazar Veng); Vice President-ah H. Rohmingliana (Chhim Veng); General Secretary-ah Zothansanga (Chhim Veng); Joint Secretary-ah Jerry Lianhming-thanga (Vengchung) leh Zoramthara (Darnam Veng); Treasurer-ah C. Lalhruaitluangi (Chhiah-tlang Kawn Veng) leh Fin. Secretary-ah R. Lalhnehzauva (Vengchung) te thlan an ni.
Kimchang zawkin »

Truck 8-ah Kuhva ro man

/
Nimin zing dar 3:00 vel khan Mizoram Police te leh Central YMA Kumpuan Sub-Committee te chuan Seling daiah Myanmar atanga dan lova rawn lut ni a rin Kuhva ro Trip 8 leh Escort motor pahnih an man. Thudawn danin, Kuhva ro te hi Truck ke 10 nei Motor 8-ah phurh niin Truck vengtu, Escort Motor 2 man tel a ni a, lirthei leh a khalhtu mi 10 te chu manin Seling Police Outpost pek an ni a, heng Kuhva phur Motor te hi Champhai atanga rawn kalin Khawzawl Gate an rawn paltlang nia hriat a ni. Dan lova Kuhva ro a sumdawnna hi a rukin kalpui reng nia a lan avangin Central YMA leh Police te chuan theihtawp chhuahin hma an la zui mek zel a ni.
Kimchang zawkin »