Kanghmun South khua ah YMA in tanpuina hlan

Tunhnaiah COVID-19 hri leng avanga har-satna tawk, Serchhip District chhunga Kanghmun South khua chu niminpiah khan Serchhip Sub-Hqrs. YMA chuan tlawhin a tul anga hman turin Buhfai bag 2, Dal bag khat leh Tel litre 12 bakah pawisafai Rs. 5000/- an hlan a, heng tanpuina te hi Serchhip Sub-Hqrs. YMA hruaitute leh Van-tawng Group YMA hruaitu ten an khua ah kalin an hlan a ni.

Serchhip District chhunga Kanghmun South khua ah hian tun thla ni 3 khan COVID-19 hri kai hi hmuhchhuah hi an pung chho a, nimin thleng khan sample enfiah tawh 179 atangin hri kai mi 69 hmuhchhuah an ni tawh a, hri kai te enkawlna atan hian Middle School leh Primary School ah 4C siam niin nimin thleng khan hri kai mi 19 enkawl dam an ni tawh a, hri kai enkawllai 50 an la awm mek a ni.

Kanghmun South khua atanga kan thudawn chuan mi inphal te thawhkhawm atangin 4C a awm te hi ei leh in a thlawna an inpek thu leh eirawng bawl tur erawh YMA in an ruat thu an sawi a. Buh seng lai an nih avangin inkhuah-khirhna hran an siam loh thu leh hri kai chhungte erawh midang nena intlawhpawh tam lo tura an tih thu an sawi bawk a ni.