Journalism hi inkaihhruaina tha tak nei, mumal taka din chhoh leh hna zahawm tak a ni - I&PR Minister

Information & Public Relation Department Minister Lalruatkima chuan Journalism chu inkaihhruaina tha tak nei, mumal taka din chhoh leh hna zahawm tak a ni tih sawiin, Mediaperson leh Journalist te chu mipui beng an ni tih hre rengin, taima tak leh dikna nen hna thawk zel turin a chah.

National Press Council of India din champha Nov. 16-a ‘National Press Day’ hman thin puala MJA General Hqrs. in nimin-a Aizawl Press Club-a inkhawm an buatsaih a hmanpuina ah he thu hi sawiin I&PR Minister Lalruatkima chuan Mediaperson leh Journalist te chu Journalist inkaihhruaina dan leh mawhphurhna vawng tlat tur leh chanchinbu-a thil chhuahte pawh a dik tawk em tih enfiah turin a chah a. Media chu hman thiam chuan ram pawhin hma a sawn dawrh theih thu leh hman sual erawh chuan buaina leh harsatna nasa tak thlen theitu a ni zawk thei tih a sawi a; chuvangin thingtlang kilkhawr tak tak thlengin Media kaltanga thuchhuahte hi mipui tibengvartu leh hriatna kawnga hmasawnna thlentu nise a duh thu a sawi a. US President hlui John F. Kennedy a khan ‘Media hmanga mipuite dikna hrilh ngam lo leh thu dik lo vawrh darhtu tamna ram chu mi dawihzep chenna hmun a ni’ a tih thu pawh Minister chuan sawiin, thudik tan ngamna kawngah pawh Journalist te chu hmasawn turin a ngen bawk.

I&PR Minister chuan Journalist-te tan Sawrkar a din reng thu leh a la ding zel dawn tih pawh saiwin, chumi rual chuan Sawrkar hmalakna, hlawhtlinna leh policy te pawh thahnem ngai taka puanzar sak a, sawrkar hmalakna a dik em tih vengtu pawimawh tak an ni tih hre reng turin a chah a. “Democracy ramah chuan Freedom of Press zar zo in media-te zalenna zau tak pek an ni a, hmansual palh erawh thil pawi tak a ni thei tih hre thar leh ang u,” a ti bawk.

COVID-19 hri leng avangin rampumah nikum atangin lockdown neih thin a nih avangin ruahmanna neih sa, Parliamentary Training te, Press Tour leh a dangte chu thulh a ngai vek ta chu pawi a tih thu Minister chuan a sawi a. Hripui leng boruak a ziaawm chhoh zel leh hun tha a la inher chhuak zelin, heng ruahmanna te pawh tih puitlin ngei a nih tur thu a sawi a. Journalist-te pension Scheme zirchiang tura Study Group din te pawhin uluk takin an bawhzui zel thu sawiin, Press Enclave chungchang pawh Covid hripui leng avangin duh angin a bawhzui chak theih loh chu pawi a tih thu a tarlang bawk.

Tunlai khawvelah Media, a bik takin Social Media a chak tawh em em tih pawh Minister chuan sawiin, heng hmang sual tur ven nan Mainstream Media-ten tun aia nasa zawka tan lak leh cho (compete) pha turin insangmar a ngai zel dawn a ni, a ti bawk.

‘National Press Day’ puala nimin-a hun hman hi MJA General Hqrs. President Zonunsanga Khiangte chuan kaihruaiin MJA President hlui leh Ex-Officio Vanlalrema Vantawl chuan Keynote address a sawi a. Thuthar thehdartute chu mi hnuaihnung zawkte thlavang hauh turte, aw nei pha ve lo te tana awrawl chhuah tura beisei an ni, a ti a. Kumin National Press Day-ah pawh hian khaw-tlangin kan buan mek ruihhlo chungchangah kan ram leh ngawlveite dinhmun inhrilhhriat nan hman nise tiin MJA leh Excise & Narcotics Department te chuan ruihhlo tihrem kawngah mipui hnena thehdarh dan tur sawihona hun an nei thei chu a lawmawm hle a ni, a ti.

National Press Day pual hian ‘Drugs Awareness Campaign’ neih nghal a ni a, he hunah hian Peter Zohmingthanga, Asst. Commissioner, Excise & Narcotics Department chu Resource Person atan hman niin tun dinhmuna Mizorama ruihhlo tawlh/zawrh dan leh ruihhlo hmangsualte enkawl dan tur chungchang chipchiar takin a sawi a, hei hi Mediaperson-te nen an sawiho zui nghal a ni.

Comments

Popular News (Last 30 Days)

Serchhip DCSO sawn a ni