DLSA in Village Level Services Camp nei mek

Serchhip District Legal Services Authority (DLSA) buatsaihin Pan-India Awareness and Outreach Campaign hnuaiah Serchhip District chhunga khaw hrang hrangah Village Level Services Camp neih chhoh mek a ni.

India ram zalenna kum 75-na lawmna kal mek, Azadi Ka Amrit Mahotsav hnuaia Pan-India Awareness and Outreach Campaign-ah hian mipui ten Dan leh hrai an hriat theihna atan leh Dan leh a kaihhnawih a zawhfiah duh an neih te an zawh theihna turin Village Level Services Camp hi Serchhip District chhunga VC hrang hrangah buatsaih mek a ni a, he hunah hian Serchhip-a Judicial Magistrate First Class, JH. Lalparmawii hovin Laithanpuia, Legal Aid Counsel leh Lalhmingthanga, Asst. Public Prosecutor bakah Ukil hrang hrang te chuan VC area hrang hrang tlawhin hun an hmang a, he programme hi tun thla ni 2 atanga tanin tun thla ni 14 thleng neih a ni dawn a ni.

He programme an buatsaih hi mipui ten an hlut hle tih District Legal Services Authority-a thawktute chuan an sawi a, a bik takin khawpui pawnlam ah hlut a hlawh lehzual tih an sawi a. Tunah hian Serchhip khawpui pawnlam chu zofel thawkhat tawhin khawpui chhunga VC Area hrang hrangah neih chhunzawm a nih tur thu an sawi bawk a ni.