Cricket-ah Serchhip District te an chak zo ta lo

Cricket Association of Mizoram (CAM) in an buatsaih President's Cup 2021-ah Serchhip District aiawha kal te chu an match hmasa berah chak zo lovin an tla.

Suaka Cricket Ground, Sihhmui-a President's Cup 2021 khelh mekah hian Cricket Association of Serchhip District hian a tum khatna atan Team a tir ve a, CASD hi CAM hnuaia awm tir an nih avangin Division pawh la nei lovin nimin khan an match hmasa berah 1st Division Club Ramhlun Venglai CC chu an hmachhawn a ni.

Vuak hmasak thlang Ramhlun Venglai in over 20 chhungin run 131 an siam a, Ball 23 atanga run 39 siamtu Vanlalrinzuala a che tha a, Vanmalsawma (29) leh Lalhmachhuana (24) te an tangkai bawk. Serchhip bowler zingah Zoramthara chuan wicket hnih lain Lalawmpuia leh Dr. Lalrintluanga Sailo ten wicket khat ve ve an la bawk a ni.

6.55 aia sang Run rate mamawh chungin CASD in vaw chhunzawm ve nghal a, chak turin Run 132 siam an mamawh a. Bowler nei tha Ramhlun Venglai CC lakah Dr. T. Lallianzela'n run 18 a siam a, Zoramthara leh Amlanjit Hazarika ten Run 17 leh 13 an thawh bawk a, amaherawh chu RVL bowler te ngam lovin run 86-ah an out vek a. RVL Bowler zingah Lalrinfela Zadeng leh Reuben Lalhruaizela ten Wicket thum ve ve an la a, over 18.3-ah an khingpuite innings titawpin Run 45 in Ramhlun Venglai CC te hi an chak ta a ni.