Chanchin thar thenkhat :

Flyover leh Terminus sawiho

Aizawl khawpui chhung kawng tawt lutuk ti ziaawm tura hmalakna kal mek chungchangah hemi zirchiang tura rawih Telecommunications Consultant India Limited (TCIL) hotute, PWD hotute leh Planning & Programme Implementation Department hotute chu Chief Minister Zoramthanga hovin CM Conference Hall-ah an thukhawm a. TCIL hian Aizawl khawpui zirchianna an neih hnuah Bawngkawn leh Vaivakawn a Flyover siam leh Public leh Commercial Vehicle chawlhna hmunpui (Terminus) siam chungchang ah Feasibility report an siam chu nimin Meeting-ah hian enho a ni a. An report thehluh chu a thuphunga pawm a ni. He report dungzuia DPR siam thuai turin leh, hmalakna tur Fund Allocate thuai a nih theih nan a rang thei ang bera sawrkar laipui-a bawhzui tura rel a ni.


Mizoram CS in ZMC a tlawh

Mizoram Chief Secretary Dr. Renu Sharma IAS chuan nimin khan Zoram Medical College (ZMC), Falkawn tlawhin an hnathawh dan leh hmalakna chi hrang hrangte a en bakah thawktute nen ZMC in harsatna a tawhte leh mamawh chi hrang hrangte an sawiho a, ZMC Project hrang hrang tihhlawhtlina tur leh infrastructure lam tih changtlunna bakah COVID-19 hri kaite enkawlna kawngah a tul anga theihtawp chhuaha hmalakpui a tum thu a sawi a ni. Chief Secretary hi ZMC Director Dr. John Zohmingthanga leh a thawhpuiten lo dawngsawngin, ZMC-a State Referral Hospital chu a tlawh bakah COVID-19 hri kaite enkawl dan te an lo hrilh a, PM Cares hnuaia ZMC in an dawn Oxygen Plant, Viral Research and Diagnostic Laboratory (RT-PCR Lab )leh Hostel sak mekte a tlawh bawk.


Go Air service chhunzawm

Mizoram-a Thlawhna service thin pakhat, Go Air (Go First ti a thlak tak) chu nimin atang khan a service ve leh tan ta a, karleh atanga an Schedule tur chu Vawiin hian tihchhuah hman beisei a ni.


Plastic khapna tichhuak

Mizoram Sawrkar Urban Developmeng & Poverty Alleviation Department chuan tun thla ni 5 khan thuchhuah siamin ‘Plastic Waste (Management & Handling) Rules, 2016 as amended in 2021, Rule 4’ in a sawi angin 75 micron aia pan Plastic siam, kawl, hralh, hman leh thil tuamna atana hman chu khap tlat a ni tih a tarlang a, he khapna dan bawh-chhetute chu kum 5 thleng lung In tan leh pawisa chawi tira hrem theih an ni tih a tarlang bawk. Hei bakah hian Polystyrene leh expanded polystyrene (thermocol tia hriat) siamchhuah, chah luh, kawl, sem, hralh leh hman pawh khap a ni bawk.


Judicial District siam belh

Mizoram-a Judicial District pahnih chauh awm chu sawrkar chuan pakhat siam belhin ‘Champhai Judicial District’ a ding ta a, nimin khan Order pawh tihchhuah a ni tawh bawk a ni. Heti hian Aizawl Judicial District hnuaiah Aizawl, Kolasib, Mamit, Serchhip leh Saitual District te an awm chhunzawm anga, Lunglei Judicial District hnuaiah Lunglei, Lawngtlai, Siaha leh Hnahthial District te awmin Champhai Judicial District siam thar hnuaiah hian Cham-phai leh Khawzawl District te a awm dawn bawk a ni.


I&PR Minister in Padma Shree dawngtu lawmpui

India rama Working Journalist upa ber leh Mizoram Journalist Association member zinga Prominent Journalist Lalbiakthanga (94), tunhnaia Padma Shree Award dawngtu chu nimin khan I&PR Minister Lalruatkima chuan a Pisa-a leng ah sawmin a puala thingpui inhona hun a buatsaih a. I&PR Minister chuan kumin a Mizoram atanga Padma Shree Award dawngtu mi 3 te a lawmpui thu sawiin, Lalbiakthanga chu Mizoram chanchinbumite zinga Padma Shree Award dawng la awmchhun a ni chu a ropuiin I&PR Department-in a chhuangin a lawmpui takzet tih a sawi a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man