Chanchin thar thenkhat :

MLA thar lakluhna neih a ni

Tuirial bial-a Assembly bye-election neih zawh taka MLA atana thlantlin K. Laldawngliana chu nimin khan Mizoram Legislative Assembly Speaker Lalrinliana Sailo chuan rinawmna thu tiam tirin 8th Mizoram Legislative Assembly Member atan a lalut a, nimin a MLA lakluhna inkhawm Assembly Conference Hall, Assembly Annexe Building-a neih ah hian Chief Minister Zoramthanga leh Minister te bakah MLA te an tel a ni. Tarlan tawh thin atangin Tuirial bialtu MLA Andrew H. Thangliana chu a boral avangin Tuirial bial-ah hian bye-election hi neih a ni a, MNF Ticket-a thlantlin K. Laldawngliana hi hneh taka thlantlin a ni.

Aizawl-ah DISHA thukhawm

Nimin khan Aizawl-a Planning & Prog-ramme Implementation Conference Hall-ah Aizawl District Development Co-ordination and Monitoring Committee (DISHA) thutkhawm chu neih niin an Chairman, Lok Sabha MP C. Lalrosanga chuan Delhi atangin biakhmuhtheihna hmangin a rawn ho a, he hunah hian Aizawl District-a Centrally Sponsored Scheme (CSS) kalpui mek te dinhmun tlangpui thlirho a ni a. CSS hnuaia hmasawnna hna khawihtu Line Department 19 te hnen atangin an hmalakna report ngaihthlak a ni a, hmalak zel dan tur sawiho nghal a ni bawk.

Inkhawmna ah zai phal sak

Champhai District-ah chuan COVID-19 hri leng avanga inkaihhruaina ah Inkhawmna a zai chungchang chu Tualchhung Kohhran ten tha an tih anga kalpui turin thuneihna pek an ni a, hemi chungchanga nimin-a Champhai District Magistrate thuchhuah chuan tun thla ni 1-a inkhuahkhirhna Order an lo tihchhuah tawh ah ‘Inkhawmna-ah te hian zai phal a ni lo’ tih chu tih danglam a ni tih sawiin, ‘Inkhawmna-a zai chungchang chu Tualchhung Kohhran-in tha a tih angin an kalpui thei ang. Inkhawmna-ah zai remtih a nih chuan fimkhur tak leh hmai tha taka tuam chungin kalpui tur a ni,’ tiin a tarlang a ni.

Thutlukna siamtha turin ngen

PC Party chuan Mizoram-a Vawk hri African Swine Fever (ASF) lên avanga Vawk 29,686 lai an thi chunga sawrkar in Calamity-a a puang lo chu ranvulhtute ngaihthahna leh thamlohna ah ngaiin na an tih thu an sawi a, thutlukna siam tha leh turin sawrkar chu an ngen bawk. PC Party chuan State Disaster Response Fund chu nakum ah pawh a lo kal leh dawn tih sawiin, Pawisa awmsa in a daihloh avanga chhiatna rapthlak thleng calamity-a kan puang lo anih chuan sawrkar tihdan leh kalphung kalh a ni tih an sawi bawk.

Mizoram CEO in Lunglei tlawh

Special Summary Revision of Electoral Rolls, 2022 neih mek chungchangah nimin khan Mizoram Chief Electoral Officer P. Jawahar IAS leh Jt. CEO David Liansanglura Pachuau te chuan Lunglei tlawhin Lunglei-a Election Department hottute nen inkawmna an nei a. CEO chuan India khua leh tui vote nei thei chin kan nih chuan vote thlak hi kan dikna chanvo leh kan mawhphurhna pawimawh tak a ni tih sawiin, kum tling chin Roll-a la inthun lo te chu Roll-a inziaklut ngei turin a sawm bawk.