Serchhip Sub-Hqrs. YMA in Khawbel tanpui

Tunhnaia COVID-19 hri kai tam tham tak hmuhna Khawbel khua hnenah Serchhip Sub-Hqrs. YMA chuan nimin, Oct. 15, 2021 khan chawhmeh chi hrang hrang thahnem tak an pe.

Serchhip Sub-Hqrs. YMA huamchhunga awm Khawbel khua ah hian tunhnai khan Hritlang leh Khawsik mi thahnem tak awmin heng mi te enfiah an nih hnuah tun thla ni 9 khan COVID-19 hri kai hmuhchhuah an ni a, hetianga hri kai hmuhchhuah an nih hnu hian Hritlang nei te hi an Sample enfiah chhunzawm nghal niin nimin thleng khan sample enfiah 233 atangin hri kai mi 102 zet hmuh an ni tawh a ni. Hetianga hri kai hmuhchhuah an tam avang hian khawtlang in harsatna nasa tak tawkin ei leh bar dap thlengin harsatna an tawk a, hei vang hian Serchhip Sub-Hqrs chuan khawtlang harsatna chhawk zangkhaina atan nimin khan chawhmeh te hi an khua ah kalin an han hlan a, tun tumah hian Dal kg 100, Chini kg 50, Chi kg 20, Purunsen kg. 25, Neutrela kg 20, Tel litre 36 leh Artui case 4 te niin heng te hi Sub-Hqrs YMA Fin. Secretary, Zolianmawia hovin SEC Member ten Khawbel Branch YMA kaltlangin VLTF te hnenah an hlan a ni.

Khawbel khua hi chhungkaw 137 awmna niin mi 790 vel an khawsa mek tih an VLTF hruaitute chuan an sawi a, tuna Sample enfiah tawh hi khaw mipui atanga chhutin zaa 29 vel niin Sample enfiah zawng zawng atanga zaa 43.77 te chuan hri an kai anga chhut a ni a, tunah hian chhungkaw engemaw zat In lama inkhunghran tir mek niin Sample enfiah hna hi chhunzawm zel tura ruahman a nih thu an sawi bawk.