CADC thutkhawm neih niin MNF Legislature Party Leader atan RM. Chakma thlan a ni

Chakma Autonomous District Council (CADC) sawrkar in buaina a tawh avanga thla khat leh a chanve vel CADC Fur thutkhawm neih theih a nih loh hnuah nimin khan thutkhawm neih a ni.

Nimin-a CADC Fur thutkhawm neih ah hian sawrkar thil pawimawh khawih nei lovin CADC Chairman chuan MNF Legislature Party Leader atan Rasik Mohan Chakma thlan a nih thu a puang a, Rashik Mohan Chakma hi CEM-ah puan mai tur a ni dawn a, Executive Committee din thuai rin a ni bawk.

Thudawn danin Chakma Autonomous District Council (CADC)-a Chief Executive Member (CEM) Durjya Dhan Chakma chuan niminpiah khan CADC Chairman kaltlangin Mizoram Governor hnenah CEM atanga banna a thehlut a. Durjya Dhan Chakma chuan ama duh thu ngeia CEM atanga banna thehlut a nih thu sawiin, CADC sawrkar leh MNF Party chhunga buaina awm chinfelna leh inremna a awm theihna a nih a beisei vanga banna chu thehlut a nih thu a sawi a. CADC chuan hruaitu thar tha zawk kaihhruaina hnuaiah hmasawnna duhawm tak a hmuh zel a beisei tih a sawi a ni.

Durjya Dhan Chakma hi Kamalanagar North atanga MDC atan thlantlin niin, kumin April 6 khan Chief Executive Member atan lakluh a ni a, tunhnaiah CEM lakah hian mipat hmeichhiatna lam hawi ah Chawngte Police Station-ah FIR thehluh a lo ni tawh a, hei vang hian MDC 10 chuan CEM atanga bang tura an nawr lai niin, amah Durjya Dhan Chakma hian a laka FIR thehluh chu intihmualpho tumna leh inpharrukna a nih thu a lo sawi tawh a. A laka FIR thehluh chu Political Party dang leh MDC thenkhat chuan remchangah la-in CADC Chairman hnenah MDC atanga amah bân turin complaint an thehlut ve nghal tih a sawi a, hemi chungchangah hian thil chiang awm lo mah se; amah puhtu leh MDC thenkhat chuan politics-a amah hnuh hniamna tur leh amah tihhmingchhiatna tura phiarrukna ah inzawmna an nei thei em tih chu ngaihdan awm thei a ni tih a sawi. Tunah chuan dan kengkawhtute hnenah he thil chhui chiang tur hian thu a thlen tawh tih sawiin, he thil hi thil serious leh sensitive tak a nih thu a sawi a, Dan dik taka rorelna dik a awm ngei a beisei thu a sawi bawk.