Mizoram-ah hri kai 1430 zet hmuh belh leh an ni

Niminpiah khan Mizoram-ah Sample 9422 enfiah leh niin heng atang hian COVID-19 hri kai 1430 hmuhchhuah leh an ni a, Sample enfiah atanga za zela 15.81 te chuan hri an kai a ni.

Niminpiah khan ZMC-a RT-PCR Laboratory-ah Sample 1292 enfiah niin heng atang hian hri kai 321 hmuhchhuah an ni a, an vai hian Aizawl District-a Sample lak vek niin Veng leh khua 52 ami te an ni a, Veng khat atanga hri kai mi 10 leh a aia tam hmuhna Veng 12 lai ala awm bawk a ni. Fluorescent Immunoassay Test hmangin niminpiah khan Aizawl-ah Sample 108 enfiah niin hri kai mi 30 hmuh an ni bawk a, an vai hian Aizawl khawpui chhung ami te vek an ni bawk.

Heng bakah hian District hrang hranga TrueNat Laboratory-ah Sample 497 enfiah ni bawkin heng atang hian hri kai mi 77 hmuhchhuah an ni a, Siaha District-ah 27, Champhai District-ah 15, Lawngtlai District-ah 13, Lunglei District-ah 9, Serchhip District-ah 4, Hnahthial District-ah 3, Kolasib leh Mamit District-ah 2 ve ve leh Aizawl leh Khawzawl District-ah pakhat ve ve te an ni.

Rapid Antigen Test hmangin niminpiah khan Sample 7525 enfiah ni bawkin heng atang hian hri kai mi 1002 hmuhchhuah an ni bawk a, an zinga 409 te chu Aizawl District-a hri kai hmuhchhuah te niin Lunglei District-ah 140, Siaha leh Champhai District-ah 86 ve ve, Mamit District-ah 75, Serchhip District-ah 68, Hnahthial District-ah 52, Lawngtlai District-ah 45, Kolasib District-ah 39 leh Khawzawl leh Saitual District-ah pakhat ve ve te an ni.

Nimin khan Mizoram-ah hri kai mi 959 te chu enkawl dam niin anmahni enkawlna hmun atanga chhuahtir an ni a, heti hian nimin tlai dar 5:00 thlenga Mizoram-a hri kai hmuhchhuah chu 1,07,566 niin an zinga 93,781 te chu enkawl dam an ni tawh a, hei hi hri kai hmuh atanga chhutin zaa 87.18 niin tunah hian hri kai enkawllai 13,422 an la awm mek a ni.

Nizan hmasa khan Mizoram-a hri kai zingah mi 4 lai boral an awm belh leh a, nimin lamah he thu buatsaih lai thleng hian thi awm belh lo thungin Mizoram-a hri kai zingah mi 363 an boral tawh a ni.