Latest News

Champhai-a RT-PCR khawl bun tur hlan fel a ni

UNICEF in ICMR kaltlanga Mizoram-a RT-PCR khawl a rawn pek chu District Hospital Champhai-a hman turin nimin zing khan Champhai South bialtu MLA leh Law Minister TJ. Lalnuntluanga chuan Champhai District Hospital hotute hnenah a hlan.

RT-PCR inhlanna puala inkhawm Doctors' Lounge, District Hospital Champhai-a neih ah TJ. Lalnuntluanga chuan District Hospital Champhai-a RT-PCR khawl dah tur thlen fela inhlan a ni ta chu District tana ni chhinchhiah tlak leh pawimawh tak a ni tih sawiin, Chief Minister leh Health Minister-te hmalakna ah lawmthu a sawi a. COVID-19 hrileng beihna kawnga NGO, Kohhran leh khawtlang hruaituten sawrkar an tawiawm thinna ah lawmthu a sawi bawk.

Minister chuan RT-PCR khawl chu a nihna tur ang taka bunfel turin khawl mai piah lamah tul leh bawhzui turte a awm nual tih sawiin, mithiamte leh khawtlang hruaitute nena inrawn chunga lungrual taka hmalak tlan zel a ngai a ni, a ti a. Inrawnkhawmna leh sawihona tha tak neia District tana khawl chhawrnahawm leh tangkai tak tur bun a nih ngei a beisei thu a sawi bawk.

Khawl hlanna neih zawh a nih hnu hian RT-PCR khawl bun lailawkna tur atana ruat, Eye Ward building leh tuna TrueNat khawl bunna leh hnathawh mekna hmun, nakin lawka RT-PCR khawl bun nghehna tura ruat hmunhma te enfiah niin, hmalak dan turte sawiho a ni bawk.

Sawrkar thuchhuah in a tarlan danin Mizoram sawrkar hmalakna leh mamawhna te hriain ICMR/DHR chuan UNICEF kaltlangin Testing Centre-te tih changtlung nan a thlawna RT-PCR rawn dah theih turin kum 2020 khan UNICEF-ah rawtna a thlen a. August ni 1, 2021 khan ICMR chuan UNICEF kaltlangin Champhai District Hospital-ah RT-PCR khawl an dah tur thu District Hospital Champhai a rawn hriattir a. September ni 25, 2021 khan UNICEF kaltlanga dawn tur RT-PCR khawl 4 zinga 3 te chuan ZMC rawn thlengin a dawngtu tur inbel sa vek a ni a, ZMC ami tur 2 leh Lunglei District Hospital a mi tur pakhat te an ni.

Champhai District Hospital-a dah tura tihfel vek tawh chu AIIMS, New Delhi-a an RT-PCR khawl a kan chhiat thut avangin AIIMS-ah an pe ta thung a, Champhai District Hospital atana tih vek tawh RT-PCR khawl chu a rawn thleng ve ta lo thung a. Hetiang a nih avang hian District Hospital Champhai-a RT-PCR khawl dah a nih theih nan Champhai District-a MLA te leh sawrkarin a tul angte bawhzuiin hma an la a, ZMC a dah tur zinga pakhat chu Champhai-a dah turin a company, Bio RAD Representative-te zuk hriattir an ni a, an ni rem tihna in September 29, 2021 khan ZMC atangin khawl hi an la chhuak a, nimin khian District Hospital Champhai-a phurh thlena hman tura hlan a ni ta a ni.

Comments

Chhiar Hlawhte