Khawpui fai inelna neih tura Serchhip District-a hmalak dan tur sawihona neih a ni

Mizoram khawpui fai inelna kalpui mek leh hemi hnua India ram State hrang hrangte Faina kawnga inelna kalpui tura Serchhip District leh Serchhip khawpui-a hmalak zui dan turte sawihona chu nimin khan Serchhip-ah neih a ni.

Serchhip District Sanitation Task Force ruahmanna anga he sawihona hun Serchhip DC Conference Hall-a neih hi District Bawrhsap leh District Sanitation Task Force-a Chairman Kumar Abhishek IAS chuan kaihruaiin khawpui fai inelna endiktuten December thla velah Serchhip District hi rawn endik tura ngaih a ni tih sawiin, hmalakna hrang hrang awmte thawh nan thla khat vel hun la nei ang kan ni tih a sawi a. Hemi chhung hian mawhphurhna neitu zawng zawngte chu theihtawp chhuah theuh tura chahin, mipuite pawhin theihtawp chhuaha faina lamah hma kan lak a pawimawh dawn thu a sawi bawk.

He thutkhawm ah hian District Urban Development Officer (DUDO) Dr. Albert Van-lalliantluanga chuan Mizoram khawpui fai inelna hi tun thla ni 2 atang khan kalpui tan a ni tih sawiin, he inelna hi kawng thum-ah neih a nih thu leh District khawpui fai thlanna te, Mizoram a Urban Town fai thlanna leh heng khawpui hrang hranga VC Area fai thlanna te neih a nih dawn thu a sawi a. He inelna neih turah hian November thla tawp-ah emaw, December thla tirah emaw endiktu an rawn kal dawn thu leh nakum January 26, India Republic Day-ah lawmman semna neih tur niin hemi hnu hian India ram State fai inelna, Swachh Survekshan pawh kalpui leh nghal a ni dawn tih a sawi a. Nikum lamah Mizoram chuan 13-na dinhmun a hauh chauh avangin tan lak a tul dawn thu a sawi bawk.

He hunah hian NULM-a District Manager Lawmzuali chuan khawpui fai inelna neih tura endikna tehfung hrang hrang hman turte tarlangin, hemi hnu hian heng tehfung hrang hranga hmalak dan tur sawihona neih a ni a, heng hmalakna tur hrang hrangah hian a mawhphur tur pawh a theih anga in ruat nghal a ni bawk. Nimin-a he sawihona hunah hian sawrkar Department hotute leh VC aiawhte bakah YMA leh khawtlang mi pawimawh te an tel a ni.

Comments

Popular News (Last 30 Days)

Serchhip DCSO sawn a ni