Latest News

Kawng laih-a harsatna chungchang DC in sawipui

Seling atanga Champhai panna kawng, NH. 6 laih mekah mi thenkhat ten Puilo ram-a hnathawktute an hnathawh tihtawp tura an tih hnuah nimin khan Khawzawl DC CC. Lalchhuangkima chuan Puilo ram a Dhariwal Buildtech Limited (DBL) Camp-ah NHIDCL aiawh, Kawlkulh leh Dulte Joint Action Committee for NH-6 leh Dulte  Economic Growth & Development Committee hruaitute a kawm.

He hunah hian JAC for NH-6 leh Dulte Economic Growth and Development Committee hruaitute chuan NH. 6 laih mekin Kawlkulh leh Dulte khua a paltlang theih nana hma an lakna ah mimal tumah huat an neih loh thu sawiin, NH. 6 bypass road hian Kawlkulh leh Dulte khua a paltlang dawn lo a nih chuan an ram chin ah kutthlak an phal dawn lo tih an sawi a ni.

Puilo khawtlang hruaitute pawhin NH-6 laih mek hian Kawlkulh leh Dulte chu paltlang ve se an duhpui thu an sawilan rualin, Puilo ram chhunga khawtlang tiralmuang lo leh nunau tithlabar zawnga hmalakna awm thin chu ti tawh lo turin an ngen a. Khawzawl DC chuan ngenna thlen chu zirchianga bawhzuipui a inhuam tih a sawi a. Thutawp siamtu tur a nih loh avangin thuneitu sâng zawkte thutlukna chu engpawh nise pawm thiam turin a ngen bawk.

Comments

Popular News (Last 30 Days)