Latest News

Bawlhhlawh paih tur hman tangkai inzirtirna atan Serchhip-ah ‘Waste to Art Exhibition’ neih a ni

Azaadi Ka Amrit Mahotsav (AKAM) Plan kalpui mekah nimin khan bawlhhlawh hman tangkai dan inzirtirna atan Serchhip Auditorium-ah ‘Waste to Art Exhibition’ neih a ni a, he hunah hian bawlhhlawh paih mai mai tur hmang tangkaia thil siamchhuah chi hrang hrang phochhuah a ni.

He Exhibition hawnna puala inkhawm tawi Serchhip District Urban Development Officer, Dr. Albert Vanlalliantluanga kaihhruai a neih ah SBM Urban Brand Ambassador R. Laithangpuii (Serchhip Kawnpui North) chuan bawlhhlawh paih mai mai tur tangkai taka hmanga thil mawi leh tangkai tak tak siamchhuah a ni leh hetiang thil phochhuahna hun siam a ni chu lawmawm a tih thu a sawi a. Hetiang thil siamchhuah te hi nakin lawkah chuan eizawnna tling ala ni dawn sawiin, hemi kawnga hmalakna hi sawrkar laipui leh Mizoram sawrkar pawhin an ngaih pawimawh thu leh he Exhibition-a tel te chuan an thiamna tipung zel se a duh thu a sawi a. Hetianga bawlhhlawh paih mai mai tur hman tangkai hi bawlhhlawh tihtlemna pawimawh tak a nih bawk avang leh bawlhhlawh tih tlem chu faina a nih avangin kan uar zel a pawimawh thu a sawi bawk.

He hunah hian NULM-a Manager, Lawmzuali chuan Exhibition an buatsaih chhan te sawiin, he hmalakna in a tum ber chu bawlhhlawh tih tlem leh chumi kawnga inzirtir chu a nih thu sawiin, bawlhhlawh siamchhuaktu kan nih vek rualin kan bawlhhlawh hian harsatna min thlen chho mek tih a sawi a. Tunah hian mipuite pawhin kan bawlhhlawh paih tur te kan thliarhran a tul tawh dawn thu sawiin, Tawih thei, Tawih theilo, mihring tana hlauhawm leh Plastic te thliarhran a tul tawh dawn thu pawh a sawi bawk.

Serchhip Auditorium-a ‘Waste to Art Exhibition’ ah hian bawlhhlawh paih mai tur hmang tangkaia thil siamchhuah chi hrang hrang phochhuah niin a vaiin dawr 28 zet hawn a ni a, an zinga 5 te chu Self-Help Group (SHG) te niin heng te hi kawng hrang hranga endik a nih hnuah a pumpui-ah R. Lalbiakhluni, Serchhip Hmar Veng chu pakhatna niin R. Vanlalfela, New Serchhip chu pahnihna a ni a, Lallianchhungi, Bukpui chu pathumna a ni bawk. He Exhibition-a tel te hi lawmman pek vek niin a titha thlanchhuah te hnenah hian Vawiin ah lawmman hlan a ni bawk ang.

Nimin a Exhibition neih hi District Bawrh-sap Kumar Abhishek pawhin tlawhin tha a tih thu leh chhunzawm zel tlak a nih thu a sawi a ni.

Comments

Chhiar Hlawhte