Chanchin thar thenkhat :

Ex-Gratia dilna ngaihtuah

COVID-19 hri leng dona a thawk LLTF/VLTF Member, hri leng vanga thi te Ex-Gratia Compensation Scheme hnuaia cheng nuai 20 pek theihna atana dilna awm 5-te ngaihtuahin Claim Approval Board chu an Chairman Ram-chuana, Addl. Secretary Finance, Task Group on Insurance Chairman ni bawk hovin nimin khan an thukhawm a. He hunah hian Aizawl District atanga Claim awm pathum zinga pahnih chu pawm niin Aizawl bakah Champhai leh Ko-lasib atanga Claim pakhat theuh chu document fel tawklo a awm avangin pawm a ni lo thung a. Heng te hi document kimchang awm hunah la ngaihtuah leh tur a ni ang. Ex-Gratia Claim thei tur hian Mizoram pumah sawrkar hnathawk (regular) 2971, Sawrkar hnathawk (regular lo) 2611 leh sawrkar hnathawk lo 21,323 bakah nihna ziaklo 8, an vaiin mi 26,913 inziaklut an awm a ni.

PSA Oxygen Plant hawng

Mizoram District hrang hrangah Prime Mi-nister's Citizen Assistance and Relief in Emergency Situations (PM-CARES) Fund atanga Pressure Swing Adsorption (PSA) Oxygen Plant hawn a nih hnuah nimin khan Lunglei District Hospital-a PSA Oxygen Plant bun thar chu Bamboo Development Board Vice Chairman Dr. K. Pa-chhunga MLA chuan a hawng a. Lunglei-a he khawl bun hi a khawl rawn thleng ah fel tawklo a awm avanga tih that leh a tul avangin Mizoram hmundang ami te hawn rualin hawn ve theih a ni lo a ni.

MLA in Ambulance hlan

East Tuipui bialtu MLA Ramthanmawia chuan MLA Fund atanga ruahman Ambulance (Maruti Eeco Van) thar chu Sesih PHC-a hman turin nimin khan Sesih PHC Medical Officer, Dr.  Eric Zaukhnin hnenah a hlan a, hemi rual hian Khuang-leng Branch YMA hnenah Oxygen Concentrator a pek bakah, VLTF hnenah Test Kit, Sanitizer leh Mask te a pe bawk.

MNF kum 60-na lawm dawn

MNF Party in kum 60 a tlin lawmna neih dan tur ngaihtuahin nimin khan MNF Diamond Jubilee Celebration Committee chu Aizawl-ah Mizo Hnam Run-ah an Chairman Vanlalzawma kaih-hruaiin an thukhawm a. He Committee hian MNF Diamond Jubilee hman dan tur tlangpui relin, Diamond Jubilee hi hrileng avangin duh angin a hman theih dawn loh thu an sawi a. Mizoram pumah kum khat chhung kawng hrang hrangin Jubilee lawmna hi neih tura ruahman niin a hawnna hun hi a champha, October ni 22, 2021 hian Vanapa Hall-ah neih tur a ni dawn a, October ni 22, 2022-ah a kharna hun hman a ni ang. MNF Diamond Jubilee hi Mizoram hmun hrang hranga MNF mi leh sa te an theih ang anga hun lo hmang ve tura beisei an ni bawk.

Tlabung-ah Ambulance hlan

Lunglei District Bawrhsap Kulothungan A IAS hmalakna a National Projects Construction Corporation Ltd. (NPCC) in CSR kaltlanga Ambulance an pek chu nimin khan Tlabung SMO Dr. R. Lalnienga hnenah Lunglei DC chuan a hlan a, NPCC hotute hian nimin khan Lunglei DC hnenah hian cheng nuai 20 man Ambulance Type C chu hlanin nimin vek khan Tlabung Sub-Divisional Hospital-a hman turin Tlabung SMO hnenah hian DC hian a hlan leh nghal a ni. Ambulance inhlanna hunah hian Lunglei DC chuan Ambulance Type C chu Lunglei District in a vawi khat neihna a ni tih sawiin, lirthei tha bik a nih angin thingtlang leh hmun chengker deuha awmte tan a tangkai lehzual a rin thu a sawi bawk.