Thutiam tih hlawhtlin kawnga tuan rang turin phut

ZPM Party chuan MNF Party chu an thutiam tam tak tihhlawhtlin kawngah tuan rang hle tura an phut thu an sawi.

Nimin-a thuchhuah an siamah ZPM Party chuan September 10, 2021-a ZPM Legislature Party ten Aizawl Press Club-a thuthar thehdarhtute an kawmna a ZPM Leader Lalduhoma thu sawi zinga RT-PCR Mobile Van leh hrileng zinga chi khat, Delta Strain chungchang chu MNF Party chuan a ni la la in an chhang nghal tih sawiin, “Khatiang khawpa ranga an rawn chhang nghal kha a za laiah ZPM Leader hian a dek fuh hle a ni tur a ni. ZPM Party tan phei chuan hetianga party thuchhuah hmanga inchhan ran thil thleng khat tak niin kan hria,” an ti a. “Hetianga an tuan a rang ang hian mipui hnena an thutiam hrang hrang - Kawng chhawng, Traffic Jam awmlohna khawpui, nuai 3 sem leh an thutiam tam tak tihhlawhtlin kawngah MNF hi tuan rang hle turin kan phut a ni,” an ti.

ZPM thuchhuah chuan MNF Party in thuchhuah an siam ah ‘Health Department hian duhsaktute thilpek an hnar ngai lo’ an tih chu, “Pu Lalduhoma’n RT-PCR khawl pek a tum an hnar te, Pu Zodintluanga’n RT-PCR a pek an hmang duhlo tlat leh political party huang pawn lama mi ten High Court-a an khin ngai hial khawpa an siam hnu pawha an la bawhzui that duh lohzia te hi an theihnghilh hman tawh a ni mai thei,” an ti a. Hrileng dona chungchangah MNF in tangka fai-a pek chu an la nghal mai thin tih sawiin, a thlawna dawn tur awm reng mahse a lei-a lei tur an zawn san thin tih an sawi a. “RT-PCR pe duh an awm reng lai pawha hmun dang a mi chah tlat duh an ni a. RT-PCR Mobile Van chungchangah pawh a thlawna dawn tur, pek inhuam an awm reng laiin kawng dang an lo dap leh char char mai a lo ni awm a, an thuchhuah khan hei hi a ti chiang hle a ni,” an ti bawk.