High Court-ah Contempt of Court Petition thehlut

RT-PCR for Chhimbial te'n Lunglei-a RT-PCR bun tura hmalak lawk a nih loh avanga Court thupek zahlo a mi pasarih an puhna Gauhati High Court Aizawl Bench-a an thehluh chu nimin khan ngaihtuah niin Gauhati High Court Divisional Bench chuan Court thupek zahlo-a an puhte chu mal te te-a kohna pe turin a ti.

RT-PCR for Chhimbial te hian Gauhati High Court-a PIL an lo thehluh tawh Court in thuremna a tih-chhuah chu bawhzui a nih danah Court thupek zahlohna, Contempt of Court a awm nia hriain Court-ah hian an thehlut leh a, an Ukil JC. Lalnunsanga chuan, Contempt of Court-ah chuan sawrkar Official-te a mimal anga khin an nih thu sawiin, Ukil rawihna pawh a mimal anga sen ngai leh hming-ah pawh a mimal ang vek a Case putluh a nih thu a sawi a ni.

Petition-a hming langte hi Chief Secretary Lalnunmawia Chuaungo, Health & Family Welfare Secretary R. Lalramnghaka, Hospital & Medical Education Director Dr. T. Lalhmangaihi, Lunglei Civil Hospital Medical Superintendent Dr. SR. Ngurchamliana, Ministry of Home Affairs Secretary Ajay Kumar Bhalla, Ministry of Health Secretary Rajesh Bhusan leh ICMR Director Bhalram Bhargava te an ni.

RT-PCR for Chhimbial hian Mizoram chhim lama RT-PCR khawl bun a nih theihna atana kumin June thla a PIL an thehluhah Gauhati High Court chuan August ni 4 khan thutlukna siamin, Lunglei-ah RT-PCR Laboratory din tur leh hma la nghal turin Mizoram sawrkar a lo hriattir tawh a ni. High Court chuan, Judgement Order chhuah atanga ni sarih chhungin Mizoram sawrkara Health Secretary chu RT-PCR Laboratory dinna tur ngaihtuahtu tur Committee siam tur te, Committee-ah chuan Member pali aia tlem lo awm tur leh Member zingah YMA Sub-Hqrs. Lunglei President leh Lunglei Thalai Pawl Chief Organiser telh ngei turin a hriattir bawk a ni.

Thudawn danin Mizoram sawrkar chuan August ni 9 khan notification tichhuakin, Gauhati High Court, Aizawl Bench thupek angin Lunglei-a RT-PCR bun a nih theihna atana hmalatu tur Committee a din a. Committee-ah hian Chairman chu Health & Family Welfare Principal Director niin Member Secretary-ah Hospital & Medical Education Director a ni a. Member-ah Lunglei Civil Hospital Medical Superintendent, Lunglei Sub-Hqrs. YMA President leh Lunglei Thalai Pawl Chief Organiser te an ni a. He Committee hi August ni 13 khan thukhawmin Tourist Lodge, Lunglei chu RT-PCR bun lailawkna atan sawrkarah rawt nise an ti a. RT-PCR for Chhimbial chuan RT-PCR bun tura sawrkar hmalakna chu duhkhawp lovin, Court thupek zahlohna leh zawm duhlohna a awmah an ngai a, High Court-ah Contempt of Court Petition an thehlut leh ta a ni.