Mizoram Health Systems Strengthening Project hawng

World Bank Group kaltlanga Mizoram hriselna ruhrel tih hma-sawnna tur, Mizoram Health Systems Strengthening Project (MHSSP) chu nimin khan Health Minister Dr. R. Lalthangliana chuan Taxation Auditorium, MINECO-ah a hawng.

US $ maktaduai 40 hu MHSSP hawnna hunah hian Health Minister chuan, “Nunna chhanhim hi kan thupui ber pakhat a nih avangin Mizoram chhunga khawpui leh thingtlang khaw hrang hranga damdawi In kan neihte tihchangtlun bakah hmanrua leh damdawi tha zawka thuamte, thawktu chi hrang hrang daktawr, nurse leh Healthcare Worker bakah Staff tul dang tha tak tak kan mamawhna phuhrukte kan ngai pawimawh em em a, heng kan mamawhnate hi MHSSP kaltlang hian tihhlawhtling turin theihtawp kan chhuah dawn a ni,” a ti.

Nimin-a hawn tak Mizoram-a Health infrastructure tih chang-tlunna tur hi ‘Mizoram Health Systems Strengthening Project (MHSSP) under World Bank’ tih a ni a. Health & Family Welfare Department chu Implementing Agency (a thawktu Department) a ni ang a, kum nga (5) chhunga thawh tur a ni. US$ 40 Million man hu project niin, USD 32 Million (80%) hi World Bank-in an tum ang a, USD 8 million (20%) hi Mizoram sawrkarin a tum tur a ni a. A rulh dan tur chu USD 32 million atanga 90% hi Department of Economic Affairs (DEA), Ministry of Finance, Govt. of India-in a rul ang a, a bak zawng 10% hi Mizoram sawrkar in a rul ang.

He Project in a tum ber chu Mizoram-a Health System kalphung tih changtlun leh tih hmasawn a ni a, Component 4 neiin Health facilities zawng zawng NQAS (National Quality Assurance Schme) Certification hmu thei khawpa tih changtlunna kawnga hmalakna turte; Mizoram Health Insurance Programme kan neih leh PMJAY te tun aia tha zawk leh mipuite te tana hlawk zawka kalpui dan tur te ngaihtuaha duan te; Damdawi In leh thawktute hnen atanga enkawlna kan dawn te tun aia tha lehzuala tihchangtlun leh tihhmasawnna turte leh engemaw tul bik thil (Emergency)-a pawhpen theihna turte a ni.

MHSSP hnuaiah hian hmalak chhoh tan ni tawhin Project Management Unit atan Individual Consultancy mi 11 lak tawh an ni a. Consultancy Services/Firm 4 lak turte Contract ziahpui tawh niin, Baseline Survey/Assessment nei tura inpeihfel thawkhat a ni tawh a. Hnahthial, Saitual leh Khawzawl District-ah CMO Office Building sakna tur atan Contract sign niin hmalakna bultan nghal a ni a. Input Base Financing hnuaia hmalakna bultanna atan Civil Hospital Aizawl Building te tehfel a, Drawing siam that mek niin, Internal Performance Agreement (IPA) tan mai thei turin inpeihfel thawkhat a ni tawh bawk a. MHSSP atan hian Committee pawh pathum din a ni tawh bawk a ni.