Kolasib-ah bawlhhlawh sawngbawlna hmun hawng

Mizoram-a Solid Waste Management Centre pahnihna ni turin nimin khan Solid Waste Management Centre, Kolasib chu UD&PA Department changtu Deputy Chief Minister Tawnluia chuan a hawng.

Solid Waste Management Centre, Kolasib hawnna hunah hian Deputy Chief Minister chuan bawlhhlawh chu hmasawnna ina a ken tel a nih angin a lakkhawm leh sawngbawl hna kalpui chu a tul hle thu a sawi a, chumi tura tangkai tak a hman tur Solid Waste Management Centre, Kolasib hawn theiha buatsaih a ni chu lawmawm a tih thu a sawi a. Bawlhhlawh sawng-bawlna hmun, buaipui hautak tak, hun engemaw chen hna chawlh lailawk tawh tipuitling tur a hmalak chhunzawm chu Mizoram sawrkarin a ngaih pawimawh thu a sawi a, he Centre tihhlawhtlin leh zualna tur chuan In tin atanga bawlhhlawh thliar kawnga hmalak a pawimawh thu a sawi bawk.

Solid Waste Management Centre, Kolasib hi Dihmuntlang, Kolasib-a awm niin Rengtekawn to Bairabi Road, Kolasib atanga KM 7 vela hlaa awm niin Pilot Project turin kum 2016 khan Detailed Project Report chu approved a ni a. Kum 2016 atangin DPR Phase-I hnuaia hna hrang hrang thawh tan a ni a. DPR Phase-II chu 2018-a approved a nih hnuin kum 2018 atangin hna tan a ni.

He hmalakna hnuaiah hian Bawlhhlawh Tawih thei leh Tawih theilo paihna turin bawlhhlawh bawm 7,300 sem niin VC Area tin tan mihring hriselna atana thalo (Domestic Hazardous Waste) paihna tur bawlhhlawh bawm lian, Community Dustbin dum sem a ni bawk a. In tin atanga bawlhhlawh thliar hran sa hi May 2021 atangin a hranga lakkhawm a ni a. Heng thliar hran sa hi Solid Waste Management Centre-a a sawngbawlna hmun tur theuh ah thlen a ni ang.

Bawlhhlawh Tawih thei lo (Dry Waste) te chu Waste Resource Management Centre-ah hman nawn theih chi (Recyclable Waste) te thliar hran a nih hnuah a bang la awm te chu Bailing Machine hmanga nem muk (compacted) leh tawn that a nih hnuah Refuse Derived Feul atana Factories in a hman turin K-NO-W Waste Pvt. Ltd. kaltlangin thawn chhuah tura ruahman a ni a. Bawlhhlawh Tawih thei (Wet Waste) te chu Vermi Compost Shed-ah Changpat leitha siam nan hman a ni anga. Changpat leitha (Vermi Compost) siam chhuah te hi hralh chhuah leh tur a ruahman a ni a. Bawlhhlawh mihring hriselna atana hlauhawm (Domestic Hazardous Waste) te chu Landfill Clearance neih hnuah Sanitary Landfill-ah mumal taka paih tur a ni.

Solid Waste Management Centre, Kolasib hi cheng vbc. 7.08 senga sak niin heng sum hi Swachh Bharat Mission (Urban) atangin cheng nuai 668 leh SEDP atangin cheng nuai 40 te a ni.