Latest News

Mizoram-ah hri kai sang chuang hmuh belh an ni

Niminpiah khan Mizoram-ah Sample 13,040 enfiah leh niin heng atang hian COVID-19 hri kai 1157 hmuh leh an ni a, Sample enfiah atanga za zela 8.32 te chuan hri kaiin hun engemaw chen hnuah ni khat-ah hri kai sang chuang hmuhchhuah an ni leh ta a ni.

Niminpiah khan ZMC-a RT-PCR Laboratory-ah Sample 1960 enfiah niin heng atang hian hri kai mi 233 hmuhchhuah an ni a, an vai hian Aizawl District-a Sample lak vek niin Bawngkawn-ah 39 hmuhchhuah niin hri kai hmuh tamna ber an ni a, Salem Veng leh Zemabawk North-ah hri kai mi 14 ve ve hmuh an ni bawk. Heng bak hri kai hmuhchhuah te hi Veng leh Khua 44 ami te an ni. Aizawl-ah hian Fluorescent Immunoassay (FIA) Test hmangin mi 15 enfiah niin hri kai mi 4 hmuh an ni bawk a, an vai hian Aizawl khawpui chhung ami te an ni.

District hrang hranga TrueNat Laboratory-ah niminpiah khan Sample 370 enfiah ni bawkin heng atang hian hri kai 68 hmuh an ni a, Lawngtlai District atangin hri kai mi 30 hmuh niin Champhai District atangin 28, Lunglei District atangin 9 leh Aizawl District atangin hri kai mi pakhat hmuhchhuah an ni.

Rapid Antigen Test hmangin Sample 10,695 enfiah niin hri kai mi 852 hmuhchhuah an ni a, an zinga 441 te hi Aizawl District atanga hmuhchhuah niin Central Reserve Police Force mi leh sa 31 zet an tel a, Bethlehem Vengthlang atangin hri kai 28 leh Zemabawk atangin hri kai 20 hmuhchhuah an ni bawk a, a bak hi Veng leh khua 76 ami te niin Tuikhuahtlang-a Mass test-ah hri kai 76 hmuh an ni bawk. Heng bakah hian Kolasib District-ah hri kai 88 hmuh niin Champhai District-ah 73, Lunglei District-ah 71, Siaha District-ah 70, Lawngtlai District-ah 57, Mamit District-ah 35, Serchhip District-ah 12, Khawzawl District-ah 4 leh Hnahthial District-ah hri kai mi pakhat hmuh an ni bawk.

Hetihlai hian nimin khan Mizoram-a hri kai zingah mi 219 enkawl dam leh niin Mizoram-a hrikai hmuhchhuah zingah mi sing nga aia tam enkawl dam an ni ta a, nimin tlai dar 5:00 thlenga Mizoram-a hri kai hmuchhhuah tawh 59,119 te zingah 50,017 te chu enkawl dam ni tawhin hei hi hri kai hmuhchhuah atangin zaa 84.60 a ni mek a, hri kai enkawllai 217 an la awm bawk a ni.

Mizoram-a hri kai hmuhchhuah zingah nunna chan erawh an la awm belh zel a, nizan hmasa dar 8:15 khan C. Ringzuala (76), Armed Veng chu a chenna In-ah boralin Home Quarantine lai a nih avangin a Sample enfiah zui ah hri a kai tih hmuhchhuah a ni a, nimin zing dar 12:30 khan JH. Rualchhawna (84), Bazar Veng Lawngtlai chu DCHC-ah boralin zing dar 4:55 khan Lalzauva (81), Zemabawk chu ZMC-ah a boral ve leh a, Mizoram-a hri kai zingah mi 217 an boral ta a ni.

Comments

Chhiar Hlawhte