Latest News

Chanchin thar thenkhat :

AMC thutkhawm neih a ni

Aizawl Municipal Corporation (AMC) chuan nimin khan AMC Mayor Lalrinenga Sailo kaihhruaiin Board of Councillors' Meeting an nei a, Zawhna leh chhanna hun hman a ni hnuah, Executive Councillor Lalringliana chuan Annual Financial Statements 2020-2021 a pharh a, rorel chhunzawm nghal a ni a. An thurel zingah AMC in Aizawl khawchhunga Parking area hmun 51 enkawl tura a thlante nena an inremna (contract agreement) chu March ni 31, 2022 thleng pawhsei a remti a. Bawlhhlawh paih chungchang sawiho a nih bakah Diesel man a san zel avanga Aizawl khawpui bawlhhlawh paihna motor neitu ten harsatna an tawh avangin motor hiring rate tuna hman lai atanga 5% a tihpun a remti bawk. Heng bakah hian khawpui thianghlim zawk leh mawi zawk kan neih theihna tura hmalak a tul zia sawiho niin, khawpui chhunga ranvulh, a bik takin Vawk vulhin khawpui chhung vawn thiang-hlim kawngah harsatna a thlen chungchang te an sawiho hnuah AMC chuan khawpui chhunga vawk vulh chungchangah mipui zirtirna (awareness campaign) nasa taka kalpui nise an ti a ni.


MOT thutkhawm nei

COVID-19 Medical Operational Team leh IDSP hotute chu nimin khan MOT Chairman Dr. ZR. Thiamsanga MLA hovin a Pisa-ah an thukhawm a, he hunah hian Dr. ZR. Thiamsanga chuan COVID-19 hri leng mek do kawng a thawktute leh tlawmngai pawl hrang hrang te inpekna chu ropui a tih thu leh tha thlah lova theih-tawp chhuah zui zel a tul thu a sawi a. Mipuite pawh COVID-19 laka kan himna tur sawrkarin dan a zam te zawm hram hram turin a sawm bawk.

He thutkhawm ah hian COVID-19 darh zel chungchanga hmalakna tur te, Mass Testing leh Covid enkawlna chungchang te bakah thil tam tak an sawiho a. Aizawl khawchhung leh ramri leh hmun danga COVID-19 hri kai tamna hmunte tlawh a, an harsatna te enpui an tum bawk.


MYC Chairman in BCCC tan Oxygen bur 5 hlan

Mizoram Youth Commission (MYC) Chairman, Dr. Vanlaltanpuia MLA chuan nimin Baptisy Church of Mizoram (BCM) in COVID-19 hri kai te enkawlna hmun an siam BCCC-a hman turin nimin khan Oxygen bur nga (5) a hlan a, BCM General Secretary in heng thilpekte hi a lo dawng a ni. Dr. Vanlaltanpuia chuan, BCM in hripui dona kawnga hma a lak dan ah sawrkar in lawmthu a sawi tih sawiin, BCCC a hman tur Oxygen concentrator 10 ruahman fel a ni tawh tih a sawi bawk.


Raltlan School kal tir dawn

Myanmar atanga Mizoram-a rawn raltlan ten zirna an chhunzawm theih dan tur chungchang ah Aizawl-a awm mek Myanmar MP te chuan nimin khan School Education Minister, Lalchhandama Ralte chu an kawm a, Education Minister chuan raltan zinga naupang sikul kalrual te chu thleibikna awmlo a sikul kaltir vek tura thuchhuah sawrkarin a siam nghal tur thu sawiin, Myanmar unau ten harsatna an tawk chu a tawrhpui thu a sawi a. Mipui thlan sawrkar tundin a nih leh thuai theih a duhpui thu pawh sawiin, Mizoram sawrkarin a theih ang tawkin an harsatna neih te a tanpui zel dawn tih a sawi bawk.


PC in sawrkar an phut

Peoples' Conference Party chuan tunhnaia Assam miten Mizoram chhung ramri hrulah hmun khuar tuma nasa taka an hma lakna chu an dem thu sawiin, a rang thei ang bera Assam mite hmalakna titawp turin Mizoram sawrkar an phut tih an sawi a. Hetianga Assam mite'n Phainuam Buarchep Phai-a lirthei luh theihna tura kawng an sial mup mup laia Mizoram sawrkar in dan tumna a neih miah lo chu hriatthiam harsa an tih thupawh sawiin, kan ram min hneh-chhuh tuma Assam mite hmalakna dodala che chhuak vat turin Home Minister Lalchamliana chu an phut thu an sawi bawk.

Comments

Popular News (Last 30 Days)