Latest News

Mizoram-ah COVID-19 hri kai 1468 hmuh belh

Niminpiah khan Mizoram-ah Sample 12,315 enfiah leh niin heng atang hian COVID-19 hri kai 1468 hmuhchhuah an ni a, Sample enfiah zawng zawng atanga za zela 11.92 te chuan hri an kai a ni.

Niminpiah khan ZMC-a RT-PCR Laboratory-ah Aizawl leh Mamit District atanga Sample lak 1833 enfiah niin heng atang hian COVID-19 hri kai mi 314 hmuhchhuah an ni a, hri kai hmuhchhuah te hi Aizawl District atanga Sample lak vek an ni. Zemabawk atangin hri kai mi 25 zet hmuhchhuah ni lehin Bawngkawn Vengthar-ah hri kai mi 22 hmuhchhuah ni bawkin hri kai 10 leh a aia tam hmuhna Veng leh khua 8 a awm bawk a, a bak zawng hi Veng leh khua 43 ami an ni. Fluorescent Immunoassay Test hmanga Sample enfiah 119 atangin hri kai mi 12 hmuhchhuah an ni bawk a, Aizawl District-a Sample lak vek an ni.

District 11-a TrueNat Laboratory 11 zingah Siaha leh Kolasib tihloh District dang zawng atangin Sample 540 enfiah ni bawkin heng atang hian hri kai 47 hmuh an ni bawk a, Champhai District-ah hri kai mi 25 hmuh niin Lawngtlai District-ah 12, Mamit leh Khawzawl District-ah 3 ve ve leh Aizawl, Hnahthial, Lunglei leh Serchhip District atangin hri kai mi pakhat theuh hmuh an ni bawk.

Rapid Antigen Test hmangin niminpiah khan Sample 9823 enfiah ni bawkin heng atang hian hri kai 1095 hmuhchhuah an ni bawk a, heng hri kai hmuhchhuah zinga 517 te hi Aizawl District-a hri kai hmuhchhuah niin Bawngkawn leh Ramthar Veng-ah hri kai mi 17 ve ve hmuhchhuah an ni a, Kanan Veng-ah hri kai mi 16 hmuh ni bawkin hri kai mi 10 leh a aia tam hmuhna Veng dang 9 lai a awm bawk a, a bak hi Veng leh khua 72 ami te niin Sample enfiah runpui neihna Tuikual South-ah hri kai 88 leh Zemabawk-ah 67 hmuhchhuah an ni bawk.

Heng bakah hian Lunglei District atangin hri kai mi 115 hmuh ni bawkin Mualcheng South-ah hri kai mi 24 zet hmuhchhuah an ni a, Kolasib District-ah hri kai 103 hmuh an ni bawk a, Champhai District-ah 83, Lawngtlai District-ah 81, Serchhip District-ah 76, Siaha District-ah 62, Mamit District-ah 31, Khawzawl District-ah 18 leh Hnahthial District-ah hri kai mi 9 hmuhchhuah an ni bawk.

Nimin khan tlai dar 5:00 thlengin hri kai enkawl dam 534 awm lehin heti hian nimin tlai thlenga hri kai hmuhchhuah chu 65,696 niin an zinga 54,590 te chu enkawl dam an ni tawh a, hei hi hri kai hmuhchhuah atanga chhutin zaa 83.09 niin hri kai enkawllai 10,879 an awm bawk.

Nizan hmasa dar 8:30 khan Lizzy Zasangi (82), Electric Veng Aizawl chu COVID-19 vangin AMC-ah a boral a, nimin zing dar 9:40 khan Chawithangi (86), Muallungthu chu boral ve lehin heti hian Mizoram a hri kai zingah mi 227 an boral ta a ni.

Comments

Chhiar Hlawhte