Chanchin thar thenkhat :

Zirtirtu chawimawina hlan

Aizawl District Education Office buatsaihin Aizawl District huamchhunga Zirtirtu tha chawi-mawina, 'Aizawl District Teachers’ Award' hlanna chu nimin khan DSE Conference Hall, Aizawl ah neih a ni a, kumin hian he chawimawina hi J. Hmingduhawmi, Headmistress Govt. Tanhril P/S- I; H. Lalhlimthanga, Headmaster Govt. Dinthar M/S-II leh Michael Lalramliana, Teacher Tuikual North H/S ten an dawng a ni. Nimin-a he hun hman hi School Education Department Director, James Lalrinchhana chuan hmanpuiin Teachers’ Award atan tehfung chi 11 hman thin a nih thu sawiin, Chawimawina dawng te hi mi chhuan-awm tak tak an ni tih a sawi a. Mizoram chhunga zirtirtute chu Target Planning nei tura fuihin, kumtin Target neia hma an lak chuan kum 5 chhung chuan nasa takin hma kan sawn thei dawn a ni, a ti.

Lunglei-ah pawh Teachers’ Day 2021 pualin ‘The Mizoram State Level Award to Meritorious and Outstanding Teachers 2021’ dawngtu Vanlal-thangi Chhakchhuak chawimawina hun nimin khan DC Conference Hall-ah buatsaih a ni a, Vanlalthangi hian Zirlaite chu Online Class a pek bakah Youtube channel te siamin Saptawng-a Video te chu naupang ten an hriatthiam lehzual theih nan Mizotawng te in a dah thin a ni.

MRB Branch thar hawng

Mizoram Rural Bank (MRB) Branch 92 na ni turin nimin khan Kawrtethawveng-ah MRB Branch thar hawn a ni a, C. Ramdinsanga, General Manager, Network-II chuan a hawng a ni. MRB hi Mizoram-a Bank zinga Branch ngah ber a ni a, Mizoram-a District leh RD Block zawng zawng tuam chhuakin Branch an hawng tawh a, September 27, 1983-ah RRB Act hmanga din niin Central sawrkar in 50%, State sawrkar in 15% leh State Bank of India in 35% share nei a din a ni a, tunah hian thawktu nghet 468 neiin, a ngheta lova thawk mi 102 an awm bawk. Nimin-a MRB Branch thar hawnna hun hi bialtu MLA, Lalrindika Ralte chuan a telpui a ni.

Mini Sports Complex tlawh

Aizawl South-I bialtu MLA C. Lalsawivunga chuan Aibawk-a Mini Sports Complex tura ruahman chu niminpiah khan a tlawh a. Aibawk Mini Sports Complex hi Rural Development Department hnuaiah NLCPR kaltlangin cheng nuai 400 senga sak tur niin NECS in kum 2018 atanga tanin kum hnih chhunga zawh tur a ni a. Football Ground bakah Contact Sports Centre sak tel tur niin Public gallery siamchhuah vek tur a nih bakah Pavillion sak tel tur a ni bawk a, sum ruahman zatve vel chu hman a ni tawh a ni. Aizawl South-I bialtu MLA chuan RD Department hnuaia thiltih ni si Aibawk RD Block ten engmah an hriatpui loh a thiltih a ni te chu mak a tih thu sawiin, tuna hmalakna chu mipuite tan a lungawi thlak lo hle nia a hriat thu a sawi bawk.

Zirlai ngaihsaklohna ah ngai

National Students’ Union of India (NSUI) Mizoram State chuan Tribal Post-Matric Scholarship zirlaiten kumtin-a an dawn thin chu tunah hian Mizoram University leh College zirlai, ZMC, RIPANS leh Nursing College zirlaite chauhin an la dawng nia sawiin, a bak zirlai engemaw zat, Class XII leh Mizoram chhung leh State pawn zirlai engemaw zat ten an la dawng ve lo niin an sawi a. Zirlai ten nghakhlel taka an lo thlir thin tun thlenga an la pe thei lo chu pawi an tih thu sawiin, tunhnaia Delhi-a kal H&TE Minister in a chinfel sak an beisei laia engmah hmalakna a rawn nei lo chu zirlai ngaihpawimawh lohna ah an ngai tih thuchhuah siamin an sawi bawk.

Kawng lai chhunzawm leh

Vairengte Aitlang-a Mizoram sawrkar in kawngpui lai tura JCB a tirh Operator chu Assam Police nia hriat ten niminpiah-a kut an thlak hnu ah nimin lamah boruak duhawmlo a thleng zui lo nia thudawn a ni a, nimin vek khan Police te venhimna hnuaiah kawng laih hna hi chhunzawm leh niin niminpiah a kut tuar JCB Operator hi In lamah enkawl mek a ni bawk.