Latest News

Ramri hrul-a khua leh hmun pawimawh ah Eng tha tak a awm theih nan chak taka hmalak mek a ni

P&E Department changtu Minister, R. Lalzirliana chuan ramri tihhmasawnna kal zelah ramri hrul-a khua leh hmun pawimawh ah Eng tha tak a awm theih nan chak taka hmalak mek a nih thu a sawi.

Nimin khan P&E Minister R. Lalzirliana hian ramri hnaih khua te tih hmasawn nan leh ramri hrul-a Police duty-na te thawmthat dan tur a hmunah enin Buarchep, Phainuam, Saihapui ‘V’ leh Vairengte-a Police duty-te leh khawtlang hruaitute a kawm a. He hunah hian P&E Minister chuan July 26, 2021-a Vairengte thil thleng avanga Assam Police 7 laiin nunna an chan chu pawi a tih rualin, he thil thleng hi Assam lam cho chhuah a nih thu leh hetiang zawnga hmalakna hi awm tawh se a duhthu a sawi. He thil thlen hnua kan chak lakna ber NH. 306 dang chat a, riltam-a min hrekhlum theih beiseia an hmalak dan leh lirthei tangkhang ten mipui kut an tawrh chungchang sawilangin, Assam CM Himanta Biswas Sarma chu Mizo mipuite leh an chhehvel State-ten a chhe zawnga an hriatreng lohna turin awm se a duhsak thu a sawi bawk.

P&E Minister chuan ramri hrul-a khua awmte tihhmasawn chu Mizoram Sawrkar in a ngaih pawimawh thu sawiin, hmasawnna hmahruai ni turin kawlphetha pekchhuahna changtlung zawk a thawmthat tum a nih thu leh hmun thenkhatah phei chuan hna kalpui tan tawh a nih thu a sawi a. Buarchep, Phainuam-a leilet neituten tangkai taka an hman turin leh Police duty-na hmuna eng chhit theihna turin Chief Minister ruahmanna in 25 KVA Transformer bun thuai tum a nih thu a sawi a, ban phun hna pawh kalpui tan a nih tawh thu a sawi.

Minister chuan tunhnaia ramria thil thleng avangin ramri venhim kawnga inpuahchah chhunzawm a pawimawh lehzual thu a sawi a, Mizoram Police-te huaisenna chu fakawm a tih thu leh thlamuanthlak a tih thu a sawi bawk a. Ramri hnaih khua tihhmasawn chu ramri venhimna kawng pawimawh tak a nih angin Mizoram sawrkar pawhin a ngaih pawimawh ber pakhat a nih thu a sawi bawk.

P&E Minister hian Buarchep-a Police duty-te tan chawhmeh leina tur Rs. 40,000/- pe in mi inphal te kaltlangin khawtlang hman turin PA System a hlan bawk a, Kawlphetha tha taka pawhluh a nih hma a Eng chhit lailawk nan Solar Lighting Unit 20 a pe bawk. Saihapui ‘V’ khawtlang leh Police duty-te chawhmeh man tur Rs. 30,000/- pawh hlanin Saihapui ‘V’ Branch YMA-ten a tul apianga an hman atan Rs. 6,000/- hlanin bialtu MLA Lalrinsanga Ralte chuan PA System a hlan ve bawk a. Minister hian Vairengte Joint VC hnenah leh Vairengte Police duty-ten a tul apianga an hman atan Rs.10,000/- ve ve a hlan bawk a ni.

Comments

Popular News (Last 30 Days)