Governor thar in Mizoram mipui thawhhopui ah a sawm

Mizoram Governor thar Brig. (Dr.) BD. Mishra (Rtd) chuan Mizoram mipuite chu Mizo-ram hmasawnna tur leh mipuite hamthatna tura thawhhopuiah a sawm.

Nimin-a Mizoram Governor thar atana lakluh a nih hnuah thuchhuah siam nghalin Governor chuan Mizoram mipuite chibai bukin, mipuite rawngbawl tura hun rem-chang siamsak a ni chu lawmawm a tih thu a sawi a. Mizoram chu State te tak te ni mahse, siamtu in malsawmna haichhuah tur tam tak a dah tih sawiin, ram mipuite inpawhtlang leh inthurual tak, remna leh muanna ngaina an ni, a ti a. He ram in theihna tam tak a neihte haichhuak turin mipui thlan ram hruaitute, sawrkar hnathawkte, loneitute, zirtirtute, thilsiamna lama thawktute, ram inrel-bawlna kengkawhtute an pawimawh vek tih sawiin, Ram hmasawnna atana thawk tur hian khawi hmunah pawh, eng hunah pawh a inpeih reng tih a sawi bawk. Mizoram mipuiten thinlung inhawng taka an lo lawm chuan a tihlimin, an tana theihtawp chhuah turin chona thar a pe tih pawh Governor chuan a sawi bawk.