Pathianni-ah hri kai 249 hmuh belh leh an ni

Pathianni khan Mizoram-ah COVID-19 hri kai mi 249 hmuh a ni a, hei hi Sample enfiah zawng zawng 1258 atang chuan zaa 19.79 zet a ni thung.

Pathianni khan ZMC-ah Sample enfiah awm lovin District hrang hranga TrueNat Laboratory zingah Siaha-ah chiah Sample enfiah awmin Sample 9 enfiah ah hri kai hmuhchhuah an awmlo bawk a, Fluorescent Immunoassay (FIA) hmanga Aizawl District-a Sample enfiah 20-ah hri kai mi 20 hmuh an ni a, an zinga mi 9 te chu Zemabawk ami niin an dang hi Aizawl Veng 7 ami an ni.

Rapid Antigen Test hmanga Sample enfiah 1229 atangin hri kai mi 229 hmuh an ni a, an zinga 173 te chu Aizawl District ami niin North Tinghmun-ah hri kai mi 18 zet hmuh an ni a, Zemabawk-ah 13 leh Armed Veng-ah 12 hmuh niin a dang hi Veng leh khua 46 ami an ni. Siaha District-ah hri kai mi 16 hmuh niin Lawngtlai District-ah 15, Mamit District-ah 8, Serchhip District-ah 5 leh Lunglei, Champhai, Kolasib leh Hnahthial District-ah mi 3 theuh hmuh an ni bawk.

Mizoram-ah hri kai enkawl zingah nimin khan mi 523 te chu enkawl dam an ni ve leh bawk a, heti hian nimin tlai dat 5:00 thleng khan Mizoram-a hri kai hmuhchhuah chu 48,711 niin an zinga 39,216 te chu enkawl dam an ni tawh a, hei hi hri kai hmuhchhuah atangin zaa 80.51 niin tunah hian hri kai enkawllai mim 9311 an la awm a. Nimin khan hri kai zingah J. Lalpari (85), Sihtlangpui; Valkhawliana (78), Falkland Aizawl leh Malsawmtluanga (63), Nursery Veng te boral lehin nimin thleng khan hri kai zingah mi 184 lai an boral ta a ni.