Latest News

Chanchin thar thenkhat :

Mobile ATM Van vailiam

Co-operation Minister C. Lalrinsanga chuan nimin khan Lunglei-a MCAB Office atangin Mizoram Co-operative Apex Bank (MCAB) Mobile ATM Van chu a vailiam a, Mobile ATM Van chu Lunglei District-a la awm ngailo leh hmasawnna duhawm tak a nih thu a sawi bawk. Mobile ATM Van hi Financial Inclusion tih hlawhtlin a nih theih nana NABARD Financial Inclusion Fund (FIF) kaltlanga ruahman niin Bank leh ATM awm lohna hmuna chengten ATM hmanga Bank Service an chhawr ve theihna tura Apex Bank leh NABARD te thawhhona a ni. Mobile ATM pahnih a bultan niin Aizawl leh Lunglei District-ah tih hmasak a ni a, a hlawhtlin dan a zirin NABARD chuan sponspor belh zel a in huam a ni. Mobile ATM hi Mahindra Bolero-a vuah niin, Apex Bank Account bakah Bank danga account neite pawhin pawisa an la chhuak thei dawn a, English, Hindi leh Mizo tawnga hman theihna dah a ni.


Test khaihlak chingfel tawh

ZMC hotute chuan tunhnaia RT-PCR hmanga Sample Test chungchanga khaihlak awm chu tunah chuan chinfel a ni tawh tih sawiin, Test kit engemawzat rawn thlen belh tawhin tunah hian 20,000 chuan rawn thleng leh thuai tura beisei a ni tih an sawi a. Nimin khan ICU khum 34 awm ah 33 luah niin Ventilator mamawh 21 an awm thu leh SEDP hmanga siam Oxygen plant 200 lpm leh PM Cares atanga hmuh 300 lpm te hman mek a nih thu sawiin, PM Cares atanga hmuh tho 1000 lpm pawh a khawl dahna tur In sakna bungrua ramri buai vanga Guwahati atanga rawn kal thei lo chu nimin khan Aizawl phurhthlen a nih thu leh Vawiin hian a bun hna thawktu ten an khawih nghal tur thu an sawi bawk.


Minister in DIET leh DEO tlawh

School Education Minister Lalchhandama Ralte leh EFCC Minister TJ. Lalnuntluanga te chuan nimin zing khan Champhai DIET leh DEO Office tlawhin thawktu ten mamawh leh harsatna an neih hrang hrangte an lo thlen a ni.


Myanmar atanga lakluh loh rel

Myanmar ramri kaltlanga nitin mamawh ei leh in lakluh chungchang relin nimin khan Cham-phai District Disaster Management Authority chu Bawrhsap, Maria CT. Zuali hovin DC Conference Hall-ah an thukhawm a. Tualchhung thar thlai leh chawhmeh tam hun lai a nih vang leh Mizoram-ah nitin mamawh ei leh bar leh tul dangte a luh that avangin tun dinhmunah ramri kaltlanga nitin mamawh eichawp lakluh chu hri leng mek dinhmun thlirin insum rih nise an ti a. Vegetables Supply Chain kaltlangin mamawhte ngaihtuah zel tha tiin, ei leh bar chungchanga harsatna awm theite DDMA in thlithlaiin a tul chuan hma lak zel nise tih a ni bawk.


Minister in BCCC a tlawh

Baptist Church of Mizoram (BCM) buat-saih Baptist Covid Care Centre (BCCC), Serkawn ami chu nimin khan Agriculture Minister C. Lalrinsanga chuan tlawhin Oxgen Concentrator leh Rs. 20,000/- a hlan a, BCCC din a nih theihna tura thawktute inpekna fakawm a tih thu a sawi bawk. BCCC hi July 28, 2021 khan hawn niin July 30 atangin Covid damlote admit-a enkawl tan an ni a, Doctor 1 leh Nurse 4 te bakah Office Staff 2 leh thawktu dang 7 in damlo an enkawl mek a ni.


BJP in Oxygen Cylinder sem

BJP Mizoram Pradesh chuan nimin khan Ai-zawl-a an Offfice-ah mi thar lawmluhna leh Oxygen Cylinder semchhuahna hun an buatsaih a, he hunah hian an President Vanlalhmuaka chuan thalai mi 4 te chu an Party-ah a lawmlut a ni. Nimin a he hun hmanna ah hian Upper Republic Local Council, Vairengte Welfare Association, West Phai-leng, Taitesena Group YMA leh Lungsen Welfare Association te hnenah Oxygen Cylinder hlan a ni a, heng bungrua dawngtute hian lawmthu an sawi bawk a ni.


Lungawilohna thlen sawiho

Champhai-Zokhawthar World Bank Road kawng laih chungchanga lungawilohna thlente ngaihtuahtu, Grievances Redressal Committee (GRC) chu nimin khan an Chairman, District Bawrhsap Maria CT. Zuali hovin Champhai DC Conference Hall-ah an thukhawm a, lungawi lohna thlen te chinfel dan tur an ngaihtuah. Champhai-Zokhawthar World Bank Road kawng laih avanga harsatna tuarte hnen atanga lungawilohna DC Office Champhai-a thehluh 26 leh PIU-a thehluh pakhat te chungchang he hunah hian ngaihtuah niin, lungawilohna thlente hi mimal hmingin 19, VC 5, Kohhran 1, Co-operative Society 1 leh NGO atangin 1 te an ni a. Leivung paihin a tihchhiat huan lo ram leh tuikawngte bakah kawng laih avanga leimin in harsatna a thlente PIU hotuten kalchilhin zirchiang se, zirchianna chu September ni 10, 2021 ralhmain District Bawrhsap hnenah thehlut se an ti a ni.


Sports Minister in lung phum

Sports Minister Robert Romawia Royte chuan nimin khan Lawngtlai College Veng-ah Lawngtlai Residential Sports School sak bul tanna lungphum phumin Lawngtlai Vengpui-ah Field awmsa tihchangtlunna tur leh Astro Turf Football Ground atana Phullem phahna tur lungphum a phum bawk a. Lawngtlai Residential Sports School hi PMJVK Scheme atanga cheng nuai 3,461.70 senga sak tur niin he sikul-ah hian Astro Turf Football Field, Multipurpose Hall, Academic Building, Hostel Building 2, Teachers Quarters te leh Principal Quarters te a awm ang. Lawngtlai Vengpui YLA Field-a Phullem phahna tur pawh hi PMJVK Scheme atang niin cheng nuai 1,005.34 sanction a ni. Sports Minister hian cheng nuai 5,019.43 senga Lawngtlai District Sports Complex sakna tur hmun pawh a tlawh nghal bawk.

Comments

Chhiar Hlawhte