Latest News

NH. 306 kawng dan titawp tura Assam sawrkar nawr chuk chuk Mizoram sawrkar in tul a ti lo

Chief Secretary Lalnunmawia Chuaungo chuan, Mizoram mamawh lakluhna National Highway 306 kawng dan titawp tura Assam sawrkar nawr chuk chuk chu Mizoram sawrkar in tul a ti lo tih a sawi.

Ramri buaina chungchangah Mizoram leh Assam sawrkar aiawhte niminpiah-a an inbiak hnuah Assam sawrkarin an mite Mizoram a zin lo tura an hriattirna sut tawh mahse, Assam atanga Mizoram-a lut lirthei ala awm lo tih nimin khan thuthar thehdarhtu ten an kawmna ah a sawi a, kawngpui dan anih avanga Mizoram sawrkar leh Mizo mipuite mangang leh chi-ai anga lan chu a fel lo tih sawiin, kawng dan titawp tura nawr chuk chuk sawrkarin tul a tih loh thu leh Mizoram mipuite chi-ai lo a, tangrual a, tan khawh tlat a tul thu a sawi bawk.

Mizoram Chief Secretary chuan, Ningani-a Mizoram leh Assam sawrkar aiawhte an inbiakna a resolution an siamah Mizoram pawhtu kawngpui dan chungchang, a tel loh chhan sawifiahin, Assam sawrkar aiawh ten kawng dan chungchang chu an chinfel tep tawh thu leh ziaka dah an duh loh avanga telh ta lo an nih thu a sawi a, “Kawng dan chungchanga mangang leh chi-ai tak anga lan a, nawr chuk chuk kha sawrkarin a duh lova, he thil thleng hi kan ngaimawh a ni tih erawh hria se a duh mai chauh a ni,” a ti.

Chief Secretary Lalnunmawia Chuaungo chuan, Assam in kawng an dan rei leh an dinhmun a tleu zel dawn zawk tih a chian thu sawiin, he an thil tih avang hian National Media-ah sawiselna nasa tak a awm thu leh kawng hi an dang reng anih chuan sawiselna a nasa zel dawn tih a sawi a, kawng dangtute ngei pawh hian an tuar in, Assam mite zingah pawh kawng dan avanga lungawilote an awm tan der tawh tih a sawi a. Assam in National Higway-306 an dan leh Rel kawng an tihchhiat chungchang chu Home Ministry lam pawh an sawipui tawh thu leh Assam sawrkar nen pawh hemi chungchangah hian an in dawr reng thu a sawi a, Assam lam hian kawng dan chu an tihfel thuai an beisei tih te an rawn hrilh reng niin a sawi bawk.

Comments

Chhiar Hlawhte