Mizoram-ah COVID-19 hri kai 575 hmuh belh leh

Niminpiah khan Mizoram-ah Sample 8083 enfiah niin heng atang hain COVID-19 hri kai 575 hmuh an ni a, Sample enfiah zawng zawng atanga zaa 7.11 te chuan hri an kai a ni.

Niminpiah khan ZMC-a RT-PCR Laboratory-ah Sample 92 enfiah awmin hri kai hmuhchhuah an awm lova, FIA (Fluorescent Immunoassay) hmangin Aizawl District-ah Sample 22 enfiah ni bawkin hri kai hmuhchhuah an awmlo bawk. District hrang hranga TrueNat Laboratory-ah Sample 229 enfiah niin hri kai mi 16 hmuhchhuah an ni thung a, an zinga mi 10 te hi Lawngtlai District ami niin an vaiin Lawngtlai khawpui chhung ami an ni a. Champhai leh Saitual District-ah hri kai mi 2 ve ve hmuh niin Kolasib leh Hnahthial District-ah hri kai pakhat ve ve hmuh an ni bawk.

Rapid Antigen Test hmangin Mizoram-ah Sample 7740 enfiah ni bawkin heng atang hian hri kai 559 hmuh an ni a, an zinga mi 302 te chu Aizawl District ami niin hri kai hmuhchhuah tamna Ramhlun South leh Zemabawk-ah hri kai mi 18 ve ve hmuh an ni a, Bawngkawn-ah hri kai mi 17 hmuh an ni bawk. A bak hi Veng leh khua 51 ami an ni. Heng bakah hian Kolasib District-ah hri kai mi 96 hmuh niin Mamit District-ah 55, Lawngtlai District-ah 40, Lunglei District-ah 35, Serchhip District-ah 19, Champhai District-ah 7, Hnahthial District-ah 4 leh Saitual District-ah hri kai mi pakhat hmuh a ni bawk.

Mizoram-a COVID-19 hri kai zingah nimin khan mi 638 te chu enkawl dam an ni ve leh bawk a, heti hian nimin tlai dar 5:00 thlenga Mizoram-a hri kai hmuhchhuah chu 47,471 niin an zinga 36,315 te chu enkawl dam an ni tawh a, hei hi hri kai hmuhchhuah atangin zaa 76.50 niin tunah hian hri kai enkawllai 10,982 an awm mek a, hri kai zingah mi 174 an boral tawh bawk a ni.