Chanchin thar thenkhat :

I-Day hmang dawn

India Independence Day vawi 75-na chu naktuk August 15, 2021 hian ramchhung hmun hrang hrangah lawm a ni dawn a, Mizoram-a he ni lawmna pui ber chu Aizawl Sipai Lammual-ah neih tur niin Chief Minister Zoramthanga’n India Hnam puanzar a pawt pharhin thuchah a sawi anga, District khawpui hrang hrangah pawh he Ni lawmna hi neih a ni ang. COVID-19 hri leng mek avangin nikum lama lo hman tawh angin he ni hi mi sawm bik tlemte ten an hmang dawn a, sawrkar chuan inkar hlata awm te, Face Mask vuah leh kut-a inchibai lohte zawm vek turin he huna kal turte chu a chah a ni.

Rajya Sabha MP lo hmuak

Mizoram Rajya Sabha MP, K. Vanlalvena chu nimin khan New Delhi atangin Mizoram-ah a rawn haw a, Mizo Students’ Union (MSU) General Hqrs. chuan Lengpui Airport-ah lo hmuakin Mizoram tana huaisen taka a dinna leh Hnam tan innghahna ngam a nihna a lantir zel avangin Tawlhloh Puan sintirin duhsakna an lo hlan a, Mizoram leh Assam ramri buai chinfelna kawnga chak taka hma la zel tur leh hnungtawlh lova kal zel tura an beisei thu sawiin, ramri chinfelna tur kawnga a hmalakna turah an thlawp tlat zel dawn tih an sawi bawk.

Iskut chinna hmanrua sem

Lunglei High Power Committee (HPC) Vice Chairman, Lawmawma Tochhawng MLA chuan nimin khan District Horticulture Office Conference Hall, Lunglei-ah Lunglei District chhunga Iskut chingtu chhungkaw thlanchhuah 14 te hnenah Iskut chinna hmanrua, thirzai leh Watercan (tui pekna) a sem a. Lunglei HPC hma-lakna a bungraw semna hunah hian Indo-Bangla Border Trade, Kawrpuichhuah tih puitlin a nih hunah pawh keimahni tualchhung atanga kan thawnchhuah theih tur tha leh awlsam tak tur chu Iskut rah a ni tih sawiin, Iskut chingtute chu Iskut chi man leh an mamawh dang bakah sumfai pawhin sawrkar in a la tanpui zel dawn tih a sawi bawk.

Thu diklo a nih thu sawi

Sports Minister Robert Romawia Royte chuan Saitual leh Hnahthial Field chungchang a Phullem phah hnathawh khaihlak awm lova kaltluang anga sawi chu thu diklo a ni tih Press Statement siama tarlangin, May 7, 2018 khan NEC Secretary chuan heng Projects 2 te hi lo tawp rih tur leh 1st instalment sum release sa pawh lo hmang lo turin Mizoram Sawrkar a hriattir thu a tarlang bawk.

BJP Thalai ten Electric Bill siam dan mak an ti

BJP Mizoram Pradesh Thalaite chuan nimin khan thuchhuah siamin P&E Engineer-In-Chief in Electric Bill ah Bill dan diklo leh fello awm lo anga a sawi chu mak an tih thu an sawi a, mipui hmuhsitna leh zahlohna lian takah an ngai tih an sawi. BJP Thalaite chuan PHE Department ten Tui Bill an siam in a hmunah Meter Reading an tih theih laia, P&E lamin an ti thei lo bik chu mak an tih thu leh, chumi piahlamah thla dang aia tam uchuak taka Meter Reading an tih theihloh chhuanlama Office atanga Meter Reading siam chawp a, an hmang ta mai chu pawi an tih thu an sawi bawk.