Latest News

August 25-ah Remsiami a rawn haw dawn

India aiawha Olympic Games-a kal Lalremsiami chu tun thla ni 25 khian Mizoram-ah a rawn haw dawn a, amah lo lawmna neih tum a ni.

Nimin khan Mizoram State Sports Council chuan an President, Robert Romawia Royte hovin Aijal Club-ah General Body Meeting neiin Olympian Lalremsiami lo hmuah dan tur leh thildangte an rel a, he hunah hian MSSC President Robert Romawia Royte chuan Olympic Games-a India leh Mizoram tihmingthatu Lalremsiami ang leh Olympic-a Mizo ten dinhmun 4-na an la hauh pha ngai loh thu sawiin, hei vang hian a chungah Mizoram sawrkar a lawm tak meuh meuh tih a sawi a, Chief Minister-in a lo tiam tawh angin, Mizoram sawrkar chuan sorkar hna tha tak a pe dawn tih a sawi a ni.

India aiawha Olympic Games-a hmei-chhe Hockey player Lalremsiami hi August 25, 2021 khian Lengpui Airport-ah a rawn tum dawn a. Amah lawmna leh chawimawina neih dan turte lo ruahman turin MSSC Vice President V. Vanlalzawma Chairman-na hnuaiah Committee an siam nghal a ni.

Sports Minister Robert Romawia Royte chuan tunah hian Mizoram sawrkara Sports Department chuan cheng nuai 20,000 velin hma a la mek tih sawiin, Sports tihchangtlun nan State sum ringawt hmang lovin 'Khelo India' leh thildang atangin sum hmuh a ni tih a sawi a. Olympic atan hmathlir tha tak neih a tul thu pawh sawiin, chumi tihlawhtling tur chuan India sawrkar a inhawng em em tih a sawi a, Mizoram pawhin Sports Industry a nei ta hi a vanneihthlak hle a ni, a ti.

Mizoram State Sports Council (MSSC) hi Mizoram-a Sports Association hrang hrangte inthlunkhawmna niin nimin-a General Body Meeting-ah hian kum kalta a hmalakna thlirin kumthar-a hmalakna tur an pawm nghal bawk.

Comments

Popular News (Last 30 Days)