Hri kai enkawllai 18 awm

Serchhip District-ah COVID-19 hri kai enkawllai mi mi 18 awm mekin hri kai zinga za zela 97.54 te chu enkawl dam an ni tawh.

Serchhip District-ah hian nimin-a he thu buatsaih lai thleng hian COVID-19 hrikai hmuhchhuah belh an awm lova, niminpiah khan Thenzawl-a 4C atangin hri kai mi 5 te enkawl dam ni bawkin nimin-ah enkawl dam an awm belh lo thung. Heti hian nimin tlai dar 5:00 thleng khan Serchhip District-a hri kai hmuhchhuah tawh chu 854 an ni a, heng zinga mi 833 te chu enkawl dam ni tawhin hei hi hri kai hmuhchhuah atangin za zela 97.54 a ni a, tunah hian hri kai enkawllai mi 18 la awmin hri kai zingah nunna chan mi 3 an awm tawh bawk a ni.

Serchhip District-a hri kai enkawllai mi 18 zinga 11 te hi IAH Thenzawl-a enkawl niin Nursing School CCC-ah mi 4, ZMC-ah mi 2 leh In lamah mi pakhat enkawl mek a ni.

Serchhip District-ah hian hri leng vanga mahni In lama inkhunghrang mi 25 an la awm mek a,sawrkar hmunhma a inkhunghrang mi 65 la awmin Vantlang hmunhma a inkhunghrang mi pakhat a la awm bawk a ni.