Latest News

CSR kaltlanga hri leng dona bungraw dawn te District Bawrhsap in a hmang turte hnenah a sem

COVID-19 hri leng dona atana AIR Foundation leh World Vision ten Corporate Social Responsibility (CSR) kaltlanga bungrua an rawn pek hrang hrangte chu nimin khan Serchhip Chief Medical Officer, Superintendent of Police, District chhunga 4C paruk, VLTF 55 leh Quarantine Facility Caretaker te hnenah Bawrhsap in a hlan.


Serchhip District Bawrhsap, Kumar Abhishek IAS hmalakna a AIR Foundation leh World Vision ten Corporate Social Responsibility kaltlanga bungrua an rawn pek semna hun Serchhip DC Meeting Hall-a neih ah District Bawrhsap chuan phal taka an mamawh petu AIR Foundation leh World Vision te chungah lawmthu a sawi a. COVID-19 hripui dona hna rim taka thawktute zawng zawng chungah lawmthu sawiin, an thawhrimna zarah Serchhip District chu Cawiin thlengin dinhmun tha takah a ding mek a ni, a ti a. Hetianga dinhmun tha taka kan din zel theih nan mipuite chu thuawih zel tura ngenin, hri leng dona-a a hmatawnga thawktute zawng zawng pawh tha thlah lo turin a ngen a, mamawh leh harsatna an neih te sawi zel tur leh, theihtawp chhuaha an tan tlan tur thu a sawi a. Heng CSR kan hmuh te, a hma deuhva kan hmuh tawh zawng zawngte pawh kha thawktute tihchak nana an theih tawka an lo tan ve na a ni tih sawiin, a tul angin an la chhunzawm zel dawn thu a sawi bawk.

He hun kaihruaitu Serchhip Addl. DC Lalmuansanga Ralte chuan sawrkar sum renchem ngai karah Bawrhsap hmalakna in Company ten an sum thawhchhuah atanga khawtlang tana an luanchhuahna an neih te dap zel a nih thu a sawi a. He hunah hian Sub-Deputy Commissioner, F. Lalnisai chuan tun tuma bungrua an pekchhuah dan sawiin, Serchhip Chief Medical Officer (CMO) hnenah AIR Foundation atanga hmuh Oxygen Cylinder 30, Regulator 21, Pulse Oximeter 30, Nebuliser 15, N-95 Mask 500, Thermometer 70, Surgical Gloves 700 bakah World Vision atanga hmuh Surgical Mask 300, Pulse Oximeter 50, PPE Set 100, Faceshield 200 leh Gloves hlan a nih thu a sawi a. Superintendent of Police hnenah World Vision atanga hmuh N-95 Mask 200 leh Surgical Mask 100 hlan a ni bawk.

Heng bakah hian Serchhip District chhunga Community Covid Care Centre (4C) zinga hri kai enkawllai nei- Chhuanthar Tlangnuam huamchhunga 4C panga leh Thenzawl Handloom Complex 4C te hnenah Pulse Oximeter 5, PPE 5, Faceshield 20, Surgical Mask 20, N-95 Mask 20 leh Gloves 50 theuh pek niin District chhunga VLTF 55 te hnenah Surgical Mask pek an ni a, Serchhip District chhungah hian Village (khua 54) awm mah se Buhkangkawn-ah a hrana VLTF a din avangin tun tumah hian pek tel a ni a, hei bakah hian Serchhip District chhunga Quarantine Facility Centre Caretaker te hnenah PPE Kit 5, Surgical Gloves 10, Gloves dang 50 leh N-95 Mask 10 theuh pek niin VLTF Chhuanthar Tlangnuam hnenah an huamchhunga 4C panga te-a hman tur leh Thenzawl Town task Force te hnenah Thenzawl Tribal Hostel Facility a hman tur pawisa fai hlan an ni bawk.

Nimin-a he hun hmanna ah hian Serchhip CMO Dr. Laldawngliana Sailo chuan Serchhip Bawrhsap Kumar Abhishek-a’n hripui dona kawnga a thawhrimna te, thawktute a tanpui nasat ziate leh rilru a sen nasat ziate chu fak tlak a nih thu a sawi a. District Bawrhsap fel leh inpezo tak kan neih avangin thawktu zawng zawngte an phur thu leh hri danna pek kawngah pawh a thlawk tha ber pawl kan nih mek thu a sawi.

Serchhip Addl. SP Vanlalnghenga pawhin he hunah hian lawmthu sawiin, Police te chu Frontline Workers ni mah se hri leng laka invenna hmanrua te Police Hqrs. atanga Unit ten an dawn bak chu mahni-a inleichawp vek thin an nih thu a sawi a, hetiang anih laia bungrua thahnem tak an dawng chu lawm-awm a tih thu a sawi bawk.

Comments

Chhiar Hlawhte