Chanchin thar thenkhat :

Lok Sabha thutkhawm titawp

Kumin July 19-a neih tan Lok Sabha Fur thut-khawm (Monsoon Session) chu nimin August 11 chawhma khan tiamchin awm lovin tihtawp a ni ta a. Ni 13 thlenga neih tura tih Lok Sabha Fur thutkhawm hi Member boral tawhte sunna hun hman zawh veleh Speaker, Om Birla chuan tiamchin awm lova tihtawp a ni tih a puang a ni. Mizoram Lok Sabha MP C. Lalrosanga chuan July 26-a Mizoram leh Assam ramri buai avanga inkahna chungchangah House-a thusawi dilin notice a thehlut a, Speaker pawh a hmu chungin Session neih chhung hian Pegasus Spyware leh Farm Law chungchanga eptu lamten Parliament thutkhawm an tihbuai reng avang leh a khat tawka House thukhawm lai tihtawp fo a nih avangin thusawina hun a awm mumal thei ta lo a ni.

Puan In tha chi 12 hlan

World Health Organisation India (WHO) chuan Mizoram sawrkar-a Health & Family Welfare Department hnenah nimin khan COVID-19 dona kawnga a tul anga an hman atan Puan In lian (Hub Tent) leh a kaihhnawih thilte a hlan a. Heng Hub Tent pakhat zel hian Khum thleh theih 3 chhawmin, Hospital Extension, COVID-19 Vaccine pekna, COVID-19 Screen-na leh COVID-19 test-na atana hman tur a nih bakah District in COVID-19 dona atana tul a tih angin a hmang dawn a ni. He Tent hian Pulse Oximeter, Furniture, BP enna, Thermometer, Solar Lamp te a chhawm nghal bawk a, Aizawl-ah 5 pek niin a dang 7 hi Chief Medical Officer thuthmun District tinah pakhat zel pek a ni.

ICU siam mek tlawh

Civil Hospital Aizawl-a ICU siam mek chu niminpiah tlai khan Covid-19 Medical Operational Team (MOT) Chairman, Dr. ZR. Thiam-sanga chuan a tlawh a, hripui kai ICU-a enkawl ngai an pun chhoh zel karah Chief Minister leh Health Minister ten ZMC-a ICU a khah reng tak avangin Civil Hospital-a ICU chu rang taka peih a ngai an tih avanga a dinhmun enfiaha tlawh a ni.

Brig. T Sailo Park tlawh

LAD Minister K. Lalrinliana chuan nimin zing khan Lengpui-a Brig T. Sailo Park tlawhin Park chhunga hmalakna te enfiahin cheibawl ngai lai te LAD Official te nen an enho a. LAD Minister chuan Hlimen Park chu hlawhtling takin pawn-lam mi enkawl tir mek a nih thu sawiin, Brig T. Sailo Park pawh Sawrkar in outsource tha a tih thu leh ngaihtuah mek a nih thu a sawi bawk.

Freedom Struggle Exhibition

India Independence kum 75-na lawmna kal zelah Mizoram State Library-ah tun thla ni 15 thleng awh tur Freedom Struggle Lehkhabu Exhibition neih mek a ni a, he Exhibition hi Art & Culture Director, R. Hmingthanzuala chuan a hawng a ni. He Exhibition-ah hian India zalenna sual dan lehkhabu ngaihnawm tak tak leh hlu tak te phochhuah a ni.

Electric Bill cancel turin ngen

ZPM General Hqrs. chuan Electric Bill thar chu cancel-a dik taka siam leh turin an ngen tih an sawi. ZPM Party hian nimin khan P&E Minister hnenah Electric Bill chungchang hi ziakin an thlen a, ZPM Secretary General, PC. Van-lalruata chuan July thla a Electric Bill chu an zir-chiang tih sawiin, Sawrkar in hrileng chhuanlama meter en lova Bill a siam chu hriatthiam har an tih thu a sawi a. “Sawrkar hian mipui a zah lovin a namnul hle niin kan hria a, a duh tan Office a Complain hun hawn hi hripui laka invenna, Social Distancing bawhchhiat theihna anih avangin mipui tan him lo hle ah kan ngai a. Chuvangin, tuna Bill thar ber hi cancel a, dik taka siam leh turin kan ngen a ni,” a ti.

MOT leh Local Level Task Force te inkawm

Medical Operational Team on COVID-19 (MOT) leh Aizawl Municipal Corporation (AMC) huamchhunga Local Level Task Force (LLTF) hruaitute chu nimin khan COVID-19 chungchangah an inkawm a. He inkawmna Assembly Conference Hall-a neih hi MOT Chairman, Dr. ZR. Thiamsanga chuan kaihruaiin Exit Test chungchang te, Contact Tracing chungchangte, Home Isolation chungchang leh LLTF ten an harsatna tawh te bakah COVID-19 do zel na tur kawnga rawtna te sawiho a ni a, Vawiin ah chhunzawm leh a ni ang.