Child Friendly Covid Care Centre siam dan tur sawiho

Nimin khan District Child Protection Committee chu Serchhip-ah thukhawmin COVID-19 hri leng mekah naupang kumtlinglo hri kai te enkawlna hmun tur siam dan tur an sawiho.

He thutkhawm Serchhip DC Meeting Hall-a neih hi an Chairman leh District Bawrhsap, Kumar Abhishek chuan kaihruaiin COVID-19 hri leng mekah a thawh thumna lo thleng thei chu naupang ten an tuar nasa thei dawn nia a lan avanga sawrkar in naupang hri kai enkawlna tur, Child Friendly Covid Care Centre ruahman tura kaihhruaina a siam tawh chungchang an sawiho a. Health Department aiawhte nen in ngaichang chunga hmalak chhunzawm tura ruahman niin, tuna Nursing School CCC building-ah hian Health Department leh DCPU te chuan Child Friendly Covid Care Centre hi a remchan anga siam turin ruahmanna siam a ni bawk.

He thutkhawm ah hian PM Cares Scheme chungchang pawh sawiho niin he ruahmanna hnuaia naupang ten hamthatna an dawn theih dan tur leh hemi atana District Magistrate, District Child Protection Unit (DCPU) leh Child Welfare Committee (CWC) te tihtur hrang hrang sawiho a ni bawk a. Hei bakah hian March 2020 hnulamah naupang nu leh pa emaw, nu emaw pa emaw chauh boral an awm chuan an data te Baal Swaraj Portal-ah thunluh a tul avangin hetiang mi zawnchhuah dan turte pawh an sawiho bawk.