Latest News

Police in Court-a thubuai an thehluh atangin zaa 93.18-ah thubuai neitu thiamloh chantir

Serchhip District Police ten kum kalta chhunga Court-a Chargesheet an thehluh atanga za zela 93.18-ah te chuan thubuai neitute thiamloh chantir an ni.

Serchhip-a India Independence Day lawmna neih ah he thu hi khuallian, Deputy Govt. Chief Whip Lalrintluanga Sailo chuan a sawi a, he huna tarlan a nih danin kum kalta chhuang khan Serchhip District Police te hian IPC hnuaiah mi 105 te chu thubuai siam sakin an zinga mi 86 te chu Court-ah Chargesheet an ni a, chung zinga mi 44 te thubuai chu Court in chingfel tawhin mi 41 te chu an thubuai ah hian thiamloh chantir an ni a, hei hi Chargesheet thehluh atanga chhutin zaa 93.18 niin hetiang zata sang Conviction Rate hi sawi tur a vang thin hle tih a sawi bawk.

He hunah hian Police te hmalakna leh hnathawh hrang hrang pawh tarlan a ni a, kum kalta chhung khan ND&PS Act hnuaiah mi 11 te thubuai siam sak niin Prevention of Children from Sexual Offences (POCSO) Act hnuaiah mi 12 te manin thubuai siam sak an ni a. Mizoram Liquor Prohibition (MLP) Act hmangin mi 12 te thubuai siam sak niin an zinga 8 te chungthu chu Court in rel fel tawhin an zinga 7 te thu thiamloh chantir an ni a, hemi chhung hian Rakzu litre 2000 leh IMFL um 24 man a nih bakah Dan lova tawlhruk Silai 12 leh a Mu round 27,465 zet man a ni bawk. Hei bakah hian ram kang kaihhnawih ah mi 7 man bawkin an zinga mi 2 te chu ngaihthah/dawngdah vanga ram tihkan vanga man niin midang 5 te chu thubuai siam sak an ni a. Mizoram Fisheries Act bawhchhiaa lui-a nungchate Tur-a hrai ching mi 4 manin thubuai siam sak an ni a, rukruk ching leh dan lova khawchhak atanga kuhva tawlh ru te pawh engemaw zat man an ni bawk.

Traffic Police te pawhin kum kalta chhung khan Dan bawhchhia lirthei ke 2 nei 215 leh ke pali nei 163 manin an pawisa chawitir tlingkhawm chu Rs. 1,74,500/- a ni a. Hei bakah hian Police te hian COVID-19 hri leng dona kawngah pawh nasa taka thawkin khawchhung hmun hrang rangah chhun zan zawma an Duty bakah Flying Squad siamin Quarantine venhim hna leh CCC venhimna te pawh an thawk a, Hri leng dona Dan bawhchhia mi 3021 man tawhin an sum chawitir tlingkhawm pawh Rs. 3,85,600/- a tling tawh a. Kan District chhunga International Border Point pahnih, Lungkawlh leh Sailulak Border-ah Duty indahin, District chhunga khaw 22-ah Village Defence Party (VDP) din thar leh a ni bawk.

Comments

Popular News (Last 30 Days)