Latest News

Assam lamin NH. 306 an hawn hnuah tluang takin Mizoram-ah bungrua a rawn lut chhunzawm

July 26, 2021-a Mizoram leh Assam Police te an inkah avanga Assam lamin State pahnih inkalpawhna kawngpui NH. 306 an danpin chu Inrinni zan-a an hawn hnuah nizan thleng khan lirthei za ruk chuang Mizoram-ah a rawn lut tawh a. Kawngpui dan avang khan Assam lama sumdawng tam takin harsatna an tawk nia thudawn a ni.

Vairengte Police Check Gate-a chhinchhiah a nih danin Inrinni zan dar 9:30 atanga nimin tlai dar 4:00 thleng khan Assam atangin Vairengte-ah hian lirthei lian 208, MMV 180 leh LMV 162 bakah Bus 2, Maxi Cab 4, Eirawngbawlna Gas phur 13 leh Oil Tanker 35, a vaiin lirthei 604 te chuan Mizoram an rawn lut a, hemi hun chhung hian Mizoram lam atanga Assam-a lut lirthei 142 a awm bawk a ni. Nimin lamah pawh State pahnih inkarah hian boruak duhawmlo thleng thar awm lovin State pahnih ah hian lirthei an inkalpawh leh mek a ni.

Hetihlai hian Assam lam atanga Mizoram luhka kawngpui (National Highway 306) tunhnaia dan a nih avang khan Lailapur leh a chhehvel khuaa sumdawngte ah nghawng a nei lian hle nia thudawn niin Dawr hawn theihloh phah pawh an awm nual nia thudawn a ni a. Helai hmun hi Inrinni khan thuthar thehdarhtu thenkhat te chuan tlawhin kawng dan avanga lirthei tangkhang te hi Dholai leh a chhehvel mi te ta a ni tlangpui a, lirthei tangkhang te hi Lailapur khaw chhungah erawh an awm lo a, Bhaga leh Dholai lamah an awm deuh ber a ni.

Mizoram luhkha kawngpui ni 10 vel dan a nih chhungin, Mizoram behchhana eizawng mi tam tak eizawnna in a tuar hle nia tih Dholai ami te chuan an sawi a, “Thlai hnah leh rah hralhna lamah harsatna a awm tan a, a chhia tam tak pawh a awm,” an ti a. Mizoram-ah buaina an tawh a rin loh thu leh Assam lam mi te kut tawrh an hlauh zawk avangin Mizoram lam pana lirthei khalh chhuah an ngam loh thu lirthei khalhtu mi pakhat chuan a sawi bawk.

Mizoram luhna kawngpui dangtute hi Lailapur tualchhung mi 10 rual vel nia hriat an ni a, thuthar thehdarhtu ten helai hmun an tlawh lai hian kawngpui hi hawn la ni lo mah se kawng dung-ah mipui pungkhawm pawh an awmlo a ni.

Comments

Chhiar Hlawhte