UNAIDS te hmalakna ah Minister in lawmthu sawi

Health Minister Dr. R. Lalthangliana chuan UNAIDS-in kan State dinhmun hri-a HIV/AIDS dona atana hma a lakna ah lawmthu a sawi.

Zirtawpni kaltaa India rama UNAIDS hotute leh Health Minister ten Mizoram-a HIV/AIDS dona kawnga Civil Society leh khawtlang in nasa lehzuala hmalak ho theihna tur kawng te sawihona, Virtual Meeting an neih ah Health Minister chuan Mizorama Kohhran hruaitu leh tlawmngai pawl -YMA/MZP/MHIP etc.te leh ram hruaitu HIV/AIDS dona atana inhawng tak takte avanga chak lehzuala hma lak theih ngei a beisei thu a sawi a; heng pawl te nen lungrual taka an thawhhona hnuaiah hian High Risk Community te pawh tangkai takin hman theih an nih a beisei thu a sawi.

Health Minister hian HIV/AIDS dona atan Health Department bakah line department hrang hrang - School Education, Higher & Technical Education, Social Welfare, Home (Prisons & Police), Excise & Narcotics bakah Kohhran leh tlawmngai pawl ten sawt zawka an thawhho theihna atana funding a pawimawh thu leh hemi atana UNAIDS lam puihna mamawh a nih thu te a thlen bawk.

He Meeting-ah hian UNAIDS lam atangin Dr. Bilali Camara, Country Director; Nandini Kapoor Dingra, Adviser; Dr. Sundar Sundaraman, Consultant leh Dr. C. Lalsangzuala Consultant te telin HIV/AIDS dona kawnga Mizoram hmabak a la thui zia te tarlan a ni a, UNAIDS lam hian Mizoram-a Kohhran leh tlawmngai pawl tha tak tak avangin he hri hluar zel tur venna tura hmalak zelna turah beiseina sang tak an neih thu an sawi a. MSACS lam chuan High Risk Community ten National AIDS Control Programme an hriatchian a tul thu te, anmahni ngei pawh an inpuihtawn theihna tura capacity building a pawimawh an tih thu te tarlangin, UNAIDS chu hemi atana ruahmanna siam thuai turin an ngen bawk.