Latest News

May 17, 2021 zing dar 4:00 thlengin khauh lehzuala inkharkhip kalpui a ni dawn

COVID-19 hri leng hluar thar leh mek avanga tukin dar 4:00 thlenga inkharkhipna kalpui mek chu a tawp hnuah a aia khuah zawkin May 17, 2021 zing dar 4:00 thleng khian kalpui leh a ni dawn a, Mizoram sawrkar hnuaia Office hrang hrangte chu khar an ni tawh dawn a ni.

Tun thla ni 17 thlenga Total Lockdown kalpui tur chungchangah hian State Disaster Management Authority-a State Executive Committee Chairman leh Mizoram Chief Secretary, Lalnunmawia Chuaungo chuan Zirtawpni khan thupek tichhuakin Mizoram chhunga COVID-19 kai thar chak taka an pun zel avangin leh a vei mek thahnem tak an awm zui zel avangin Lockdown kalpui mek chu tidanglamin inkhuahkhirhna thupek khauh lehzual, Total Lockdown Guideline chu May 10, 2021 zing dar 4:00 atanga May 17, 2021 zing dar 4:00 thleng hman tur a ni dawn tih a tarlang a. He kaihhruaina a tarlan angin Mizoram-a lut turte reng reng chu Sawrkarin a hawn mek Entry Points kaltlang chauhvin an lut thei anga. Mizorama lo lut tur te chu mPass-ah an inregister ngei tur a ni. Mizoram-a rawn lut te chu Screening leh Quarantine kalpui zui zel a ni dawn a ni.

He kaihhruaina thar ah hian AMC Area leh District Hqrs. ah te inkhuahkhirhna hun chhung hian mahni In leh compound chhuahsan khap niin, building khata In hrang hrang luahte pawh intlawhpawh loh tur a ni a, tul bik thil vanga chhuah ngai – damdawi lei tur, nitin mamawh lei tur leh Doctor hnena inentir turte chuan an awmna VLTF/LLTF te phalna an la hmasa tur a ni. Lirthei veivah chu khap chhunzawm zel niin zan lam dar 7:00 atanga a tuk zing dar 4:00 thleng Curfew chu kalpui chhunzawm zel ala ni dawn a, inkhuahkhirhna hian phalna pek bik tlem huam lovin a hma aiin phalna pek bik te hi tihtlem a ni bawk a. Eichawp dawr, Thlai, chawhmeh leh sa zawrhna te chu Ningani-ah hawn a ni anga, heng dawr leh chawhmeh zawrhna te hi tlai dar 5:00-ah an inkhar vek tur a ni thung.

Mizoram Sawrkar hnuaia Office zawng zawngte chu khar tur niin DM&R, H&FW, Home (Police, Fire & Emergency Services, Home Guard & Civil Defense), Finance & Treasury, District Administration, Civil Aviation leh I&PR te chu COVID-19 dona leh hna tul bikah an kal thei anga, hna pawimawh bik leh tul zual thawktu tur a tlem thei ang ber hming hmerhin Office kal tur hi siam tur a ni anga. Office-a kal tur ni lo leh COVID-19 duty-a tello te chuan anmahni In atangin hna an thawk anga, a tul angin mahni veng VLTF/LLTF te an tawiawm bawk ang. Hmasawnna hnathawh hrang hrang, lo leh huan lama hnathawh, quarry-a lung lak leh a dangte chu AMC Area pawnah leh District Hqrs. pawnah te chuan khuahkhirhna awm lovin kalpui theih a ni anga, AMC Area leh District Hqrs. ah te chuan hnathawh phalna hi tarlan a awm tawhlo thung.

Public Park, Picnic Spot, Movie Theatre, Gym, Football/Futsal Ground, Community Hall, Restaurant, Shopping Complex, Mall, phalna pek ni lo dawrte leh intawllenna hmun zawng zawng chu khar chhunzawm tur niin zirna In leh Sakhaw biakna hmun te chu khar chhunzawm tur a ni ang. Inneihna leh reception bakah mitthi vuina ah te mi 30 aia tam punkhawm phal a ni lo zui zel dawn a, Birthday leh Anniversary lawmna, Games & Sports, Book Release, Lungphun leh intihhlimna ang chi reng reng te huaihawt phal a ni lo.

Zin veivah chungchangah mahni chenna khua chhuahsana zin veivah khap tlat niin loh theihloh thil – Chhiat tawh leh damlohna-a mahni khua chhuahsana zin veivah a tul chuan mahni awmna Veng leh khua-a VLTF/LLTF te hriatpuina lehkha nen zin veivah theih a ni anga, Chhungkua, mimal eizawnna kaih-hnawih ni lo, a huhova lui kal, ramhnuai-a Picnic, Hiking leh Adventure Sports te khap a ni bawk.

Comments

Chhiar Hlawhte