Miharsa te chhawmdawlna atan CMRF hman zel duh

Mizoram Pradesh Congress Committee (MPCC) chuan CM Relief Fund for COVID-19 chu ‘Relief Fund’ a nih ang ngeiin, mi harsate chhawmdawl nan hman zel ni tawh rawh tih chu an duhdan a nih thu an sawi.

Nimin a thuchhuah an siamah MPCC Media Department chuan May 17, 2021 khan Mizoram sawrkar chuan CM Relief Fund for COVID-19 a pawisa tling-khawm atangin Rs. 91,50,000/- chu Total Lock-down avanga chhuanchhama awm mekte tanpui nan pekchhuah a nih tur thu a chhuah tih tarlangin, hei hi opposition party-te leh Mizoram mipui pawhin CM Relief Fund hman dan tur dik tak nia an ngaih, nasa taka an nawr thin a nih thu an tarlang a. Hetianga CM Relief Fund for CO-VID-19 in mi retheite hnen a thleng ve dawn ta chu lawmawm an tih thu sawiin, Mizoram mipui in engemaw chen chu hnehna kan chang ta tihna a ni, an ti a, Mizoram sawrkar chu mipuiin kan nawr nat phawt chuan thil tha ti turin a la nawr kal chawp theih tih a chiang hle niin an tarlang bawk.

MPCC thuchhuah chuan CM Relief Fund-ah hian kum 2020 chhung khan thla 4 (April - July 2020) chhungin cheng vbc. 20 chuang kan thawhkhawm hman nia tarlangin, hemi chhung hian vbc. 16 chuang zet hmanral a ni tih an tarlang a. “CM Relief Fund hman danah mipui kan lungawi loh avangin kan thawhkhawm tha duh ta lova, hemi hnu kum 1 chhung hian cheng vbc. 3 vel chauh kan thawhkhawm tawh a ni,” an ti. 

CM Relief Fund for COVID-19 chu sawrkar thilah hman ni tawh lo se la, Relief Fund a nih ang ngeiin mi harsate chhawmdawl nan hman zel ni tawh rawh se tih chu Congress Party duhdan a ni tih sawiin, “Hei hi mimal, Kohhran leh páwl hrang hrangin CM Relief Fund-a pawisa an chhunluh chhan dik tak a ni bawk,” an ti bawk.